İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 141 Hüküm no: 107 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zümrüt bt. Avanes’in Tophane’deki ekmek fırını ve değirmenin dört hissesini Agop v. Serkiz’e beş yüz elli guruşa sattığı Mübâya‘a-i habbâz Mahmiye-i İstanbul’da Samatya kurbünde mütemekkine Zümrüt bt. Avanes Nasrâniye tarafından husûs-ı âtiyyü’z-zikrde vekîl olduğu şahsını ârifân Mikail v. İstefan ve Vartan v. Tomas nâm zimmîler şehâdetleriyle sâbit olan Serkiz v. Aleksan nâm zimmî meclis-i şer‘-i hatîr-i lâzımü’t-tevkīrde habbâz tâifesinden işbu bâ‘isü’s-sifr Agop v. Serkiz nâm zimmî muvâcehesinde bi’l-vekâle ikrâr-ı tâm ve takrîr-i kelâm edip akd-i âtiyyü’z-zikrin sudûruna değin müvekkile-i mezbûrenin yedinde mülk ve hakkı olup Kasaba-i Tophâne’de Ağa Hamamı fırını demekle ma‘rûf bir bâb ekmekçi fırını ve ona merbût karşusunda kâin beyne’l-esnâf gedik ta‘bîr olunur yirmi sehim i‘tibâriyle beş horoslu bir değirmende olan dört re’s bargir ve dört re’s bargire isâbet eden sâir âlât-ı lâzıme-i ma‘lûmesini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûr Agop zimmîye beş yüz elli guruşa bi’l-vekâle bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ve kabûl ettikden sonra semeni olan meblağ-ı mezkûr beş yüz elli guruşu müşteri-i mesfûr Agop zimmî yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan bi’l-vekâle mesfûr Agop zimmînin zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl edip fîmâ-ba‘d zikrolunan dört re’s bargir ve dört re’s bargire isâbet eden sâir âlât-ı lâzıme-i ma‘lûmede müvekkilem mesfûre Zümrüt Nasrâniyenin asla ve kat‘â alâka ve medhali kalmayup müşteri-i mesfûr Agop zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 9 min-Rebî‘ülevvel sene [1]194. Şuhûdü’l-hâl: eş-Şâhidûne’s-sâbıkūn.