İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 142 Hüküm no: 108 Orijinal metin no: [32a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleymâniye Camii yakınında ve Kantarcılar’daki dökmeci esnafının damga nizamnamesi Dökmecilerin damga nizâmı Âsitâne-i aliyye’de Süleymâniye Câmi‘-i şerîfi kurbünde ve Kantarcılar içinde vâki‘ dökmeci esnâfından bâ‘isü’l-kitâb Dökmeci el-Hâc Osman b. Ömer ve kethudâları Mustafa Usta b. İbrahim ve yiğitbaşı[sı] Süleyman b. Osman ve ihtiyârlarından el-Hâc Mehmed Said b. Ali ve el-Hâc Mehmed b. Mehmed ve Hasan Odabaşı b. Mahmud ve Molla Mehmed Usta b. Abdüllatif ve Ali Usta b. Mehmed ve Mustafa Usta b. el-Hâc Ebûbekir ve Ahmed Beşe b. İbrahim ve Feyzullah Beşe b. Mustafa ve Abdullah Usta b. Abdullah ve Mehmed Emin Usta b. Mehmed ve Mehmed Usta b. Yusuf ve sâirleri meclis-i şer‘-i hatîr-i lâzımü’t-tevkīrde hâlâ kuyumcubaşı olup esnâf-ı mezkûrenin isâga eyledikleri dirhemlere darb-ı damga etmeğe me’mûr olan Mehmed Bey nâm kimesne mahzarında üzerine da‘vâ ve takrîr-i kelâm edip kadîmü’l-eyyâmdan bu âna gelinceye değin isâga eylediğimiz envâ‘-ı dirhemleri kuyumcubaşı olanlar ba‘de’l-vezn ayârları ma‘lûm oldukda ücret-i kadîmesi olan ikişer akçeyi alup her bir dirhemin üzerine bilâ-nizâ‘ darb-ı damga edegelmişler iken kuyumcubaşı-i merkūm Mehmed Bey beher nev‘-i dirhemin üzerine darb-ı damga içün hilâf-ı âdet-i kadîme beşer akçe ücret mutâlebe etmesi zikrolunan dirhemlerimizin damgasız kalup satılmamasına bâ‘is ve bizleri ızrâra bâdî olmağla, her bir dirheme darb edeceği damga içün kadîmesi üzere ikişer akçe alup hilâf-ı nizâm-ı kadîm ve mugāyir-i sened-i şer‘î ziyâde taleb etmemek üzere doksan senesi Cumâdelûlâsı’nın yirmi yedinci günü târihiyle müverrah yedimize i‘tâ olunan bir kıt‘a i‘lâm mantûkunca tenbîh olunmak matlûbumuzdur deyü teşekkî eylediğimizde, Kuyumcubaşı Mehmed Bey dahi Âsitâne-i aliyye’de mevcûd olup yedlerinde i‘mâl eyledikleri dirhemleri ba‘de’l-ayâr damga darb ettirmeğe muhtâc olan esnâf-ı sâire vech-i muharrer üzere darb-ı damga içün getirdiklerinde her birine [her biri] rızâlarıyla beşer akçe vermeleriyle sizlerden dahi bu kıyâs ile beşer akçe taleb ederim deyüp lâkin minvâl-i muharrer üzere bizden beşer akçe taleb etmeğe kuyumcubaşının ve ikişer akçeden ziyâde vermemek üzere biz dahi sened ittihâz eylediğimiz i‘lâm-ı mezkûrda tasrîh olunmadığından, beynimizde münâza‘ât-ı kesîre ve muhâsamât-ı vefîre vâkı‘a olmuşidi. El-hâletü-hâzihî beynimize muslihûn tavassut edip fîmâ-ba‘d darb-ı damga içün kuyumcubaşıya getirdiğimiz beher nev‘-i dirhemleri ayâr mertebesine karîb oluncaya değin kendimiz eğeleyüp ba‘dehû ikişer buçuk akçe darb-ı damga ücreti vermeğe râzî olduğumuzda, kuyumcubaşı-i merkūm dahi vech-i muharrer üzere getirdiğimiz dirhemlere ikişer buçuk akçe ile darb-ı damga edip ziyâde [32b] talebiyle bizlere rencîde etmemek üzere ahd ü mîsâk ve kavl ü ittifâk edip bu vechile kat‘-ı münâza‘a eyledik dediklerinde kuyumcubaşı-i merkūm dahi esnâf-ı mezkûreyi kelimât-ı meşrûhalarında tasdîk etmeğin mâ-vaka‘a bi’t-taleb ketb olundu. Fî 15 Rebî‘ülevvel sene [1]194. Şuhûdü’l-hâl: Muhzırân Kethudâsı Mehmed Ağa, İsmail Çelebi b. Ali, Baltacı el-Hâc Mustafa, Duhânî Ali Çelebi, Akşehirli Osman.