İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 143 Hüküm no: 109 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koruk Mahmud Mahallesi’ndeki vakıf menzilin babasının vefatından ötürü oğlu Mehmed Emin b. Ahmed Efendi’ye ve kardeşi Sâliha’yla birlikte oturmak üzere tevcih edildiği Tevcîh-i menzil Dârü’l-hilâfeti’l-aliyye Kostantıniyyeti’l-mahmiye’de Koruk Mahmud Mahallesi’nde vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât merhûm Receb nâm sahibü’l-hayrın süknâsını ulemâya şürût ve ta‘yîn eylediği vakıf menzile tevcîh-i hâkimü’ş-şer‘le mutasarrıf olan Ahmed Efendi b. Abdürrezzak fevt olmağla, hâkim-i muvakki‘-i sadr-ı kitâb bi-tevkī‘ihi’r-refî‘ü’l-müstetâb ‒rafe‘a kadrehû mevlâhü’l-Vehhâb‒ efendi hazretleri menzil-i mezkûru ulemâdan olup her vechile süknâya muhtâc ve mahall ve müstahık olduğu zeyl-i kitâbda muherrerü’l-esâmî sikāt-ı Müslimîn ihbârlarıyla zâhir ve nümâyân olup müteveffâ-yı mezbûr Ahmed Efendi’nin oğlu olan bâ‘isü’l-kitâb Mehmed Emin nâm kimesneye müteveffâ-yı mezbûr Ahmed Efendi’nin kızı Sâliha beraber sâkine olmak üzere ber-mûceb-i şart-ı vâkıf tevcîh ve zabt ve tasarrufuna izin vermeğin mâ-hüve’l-vâki‘ bi’l-ibtigā ketb ve imlâ olundu. Fî 19 min-Rebî‘ülevvel sene [11]94. Şuhûdü’l-hâl: Yusuf Çavuş Ağa, Yusuf Ağa b. Abdi, Kuzât-ı Mısrıye’den Mehmed Efendi, el-Hâc Mehmed Ağa, Mehmed Ağa.