İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 144 Hüküm no: 110 Orijinal metin no: [32b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arabacı Bâyezid Mahallesi’ndeki menzilin İskender Ağa Vakfı’na ait olduğu hususunda mütevellî ve kiracının anlaştıkları Menzil ve vakf olduğunu ikrâr İstanbul’da Koca Mustafa Paşa kurbünde Arabacı Bâyezid Mahallesi imâmı bâ‘isü’l-kitâb Ahmed Efendi b. Halil nâm kimesne meclis-i şer‘-i hatîr-i lâzımü’t-tevkīrde zikri âtî menzile vaz‘-ı yedi mütehakkıka olan zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe <> Rukiye bt. İsmail nâm hatun mahzarında üzerine da‘vâ ve takrîr-i kelâm edip ashâb-ı hayrâtdan merhûm İskender Ağa nâm kimesne zikrolunan Arabacı Bâyezid Mahallesi’nde vâki‘ bir tarafdan Sâ‘atcibaşı menzili ve bir tarafdan Usturacı Ahmed menzili ve bir tarafdan Hammâmî Çukadârı menzili ve bir tarafdan tarîk-i hâs ile mahdûd [ve] ma‘lûmü’l-müştemilât bir bâb menzilini vakıf [ve] galle ve tevliyetini evvelâ kendüye ve ba‘de vefâtihî zevcesi Mihriban Hatun’a ve ba‘de vefâtihâ evlâdına ve evlâd-ı evlâdına ve ba‘de’l-inkırâz sâlifü’l-beyân Arabacı Bâyezid Mahallesi’nde imâm olanlara şart edip evlâd münkariz olmağla nöbet-i tasarruf-ı tevliyet bana gelmişiken mezbûre Rukiye Hatun menzil-i mahdûd-ı mezkûra bi-gayr-ı hakkın vaz‘-ı yed etmekle, suâl olunup menzil-i mezkûrdan kasr-ı yed ve ber-vech-i muharrer vakıf içün bana teslîme tenbîh olunmak bi’t-tevliye murâdımdır deyü da‘vâ ettikde, mezbûre Rukiye Hatun menzil-i mahdûd-ı mezkûra vaz‘-ı yedini ikrâr edip lâkin sâbıkā kayınvâlidem Fâtıma bt. Abdülkerim nâm hatun bin yüz doksan senesi Rebî‘ülâhiri’nin yirmi dördüncü günü târihiyle müverrah Davudpaşa Mahkemesi Nâibi İsmail Efendi imzâsıyla mümzât hüccet-i şer‘iyye nâtık olduğu üzere menzil-i mezkûru iki yüz elli guruşa bâten bana bey‘ ve temlîk ve teslîm etmekle mülkiyet üzere vaz‘-ı yed ederim deyüp ber-vech-i muharrer imâm meşrûtası olduğu ma‘lûmum değildir deyü meşrûtiyetini ba‘de’l-inkâr müdde‘î-i mezbûr Ahmed Efendi vakf-ı mezkûr evkāf-ı kadîmeden olduğundan tescîlini ve ber-vech-i muharrer meşrûtiyyet üzere zabt ve tasarruf olunduğu sübût bulmadığından beynimizde ba‘de vukū‘ı’l-münâza‘a bâ-vesâtet-i muslıhîn mezbûre Rukiye Hatun menzil-i mezkûrun ber-minvâl-i muharrer imâm meşrûtası vakıf olduğunu ikrâr ve i‘tirâf ettikde, ben-dahi menzil-i mezkûru beher şehir otuzar akçe icâre-i müeccele ile mezbûre Rukiye Hatun’a îcâr, ol dahi vech-i muharrer üzere istîcâr ve kabûl ve beher şehir otuzar akçe icâre-i müeccelesin cânib-i vakfa edâ ve teslîm etmek [33a] üzere ta‘ahhüd eyledi dedikde mezbûre Rukiye Hatun dahi mütevellî-i mezbûr Ahmed Efendi’yi kelimât-ı meşrûhasında tasdîk etmeğin mâ-vaka‘a bi’t-taleb ketb olundu. Fî 19 min-Rebî‘ülevvel sene [11]94. Şuhûdü’l-hâl: Mehmed Ağa b. Ahmed Kethudâ-yı muhzırân, İsmail Çelebi b. Ali, İbrahim Çavuş, Veliyüddin b. es-Seyyid Mustafa, Mehmed Said b. ( ).