İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 145 Hüküm no: 111 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata Kürkçükapısı’ndaki ekmekçi fırını gediğinin ölen sahibi Konstantin’in borçlarına karşılık kayyım ve vasî Uncular Kethudası marifetiyle Ahmed Ağa b. Mehmed’e üç yüz guruşa satıldığı Vasî bey‘ini ikrâr Âsitâne-i aliyye ve tevâbi‘inde vâki‘ ekmekçi ve uncu esnâfı vakit ve zamanıyla altı aylık zahîre der-anbâr ve narh-ı rûzî üzere tâmmü’l-vezn dakīk bey‘ ve tabhı nisâbında nân-ı azîz işleyüp mutasarrıf oldukları fırın ve değirmenlerini kapamak ve gediklerini âhara bey‘ ve îcâr ve i‘âre murâd eylediklerinde, kethudâları ve nizâm ustaları ma‘rifetleriyle fırın ve değirmeni idâreye kādir ve mu‘temed ve müte[me]vvil olup ve ber-vech-i muharrer bey‘ ve îcârları cümle ma‘rifeti ve nizâm ustaları kefâletiyle İstanbul kādıları efendiler huzûrlarında tescîl olunmak cânib-i mîrîden ve kapan tüccârından ve sâirden aldıkları zahîrenin akçesini edâda cefâ ve tehir etmemek nizâm-ı kadîmlerinden olup ve işbu şürût-ı nizâm üzere hareket etmeyenlerin fırın ve değirmen gediklerini âhara vermek dahi şürût-ı nizâmlarından olmağla, mahrûse-i Galata’da Kürkçü Kapısı dâhilinde vâki‘ yalnız bir bâb ekmekçi fırınının beyne’l-hiref gedik ta‘bîr olunan âlât-ı lâzıme-i ma‘lûmesine mutasarrıf iken hâlik olan Kostantin zimmînin dakīk bahâsından Uncu Filibos zimmîye yüz yetmiş iki guruş ve Uncu Mahak zimmîye yüz elli iki guruş ve Uncu Kazer zimmîye iki yüz yirmi guruş ve mülk sahibi el-Hâc Ahmed b. el-Hâc Mehmed’e iki yüz yirmi guruş deyni olup ve zikrolunan fırın mu‘attal ve kirâsı sahibine verilmemekle hâlik-i mesfûrun zikrolunan fırında gedik ta‘bîr olunur âlât-ı lâzıme-i ma‘lûmesi deynini edâ içün semen-i misilleriyle bey‘a kıbel-i şer‘den kayyım ve vasî nasb olunan Uncular Kethudâsı Mustafa Ağa b. Ahmed nâm kimesne zikri âtî âlât-ı lâzımeyi hâlik-i mesfûr Kostantin zimmînin deyni içün âhara bey‘ ve semenini deynine edâ etmek üzere nizâm ustaları ma‘rifetleriyle zikrolunan gediği Kapan-ı dakīk’de müzâyede ve bâlâda tafsîl olunduğu üzere sâlifü’z-zikr fırını idâreye kādir olduğu esnâfdan mazbûtü’l-esâmî kimesneler ihbâr ve esnâfdan mu‘temed ve müte[me]vvil ustalardan her biri kefîl oldukları fırın-ı mezkûrun sahibi bâ‘isü’l-kitâb mezbûr el-Hâc Ahmed Ağa b. el-Hâc Mehmed üzerinde üç yüz guruşda karâr-dâde ve ziyâde ile tâlib-i âharı zuhûr etmeyüp ve meblağ-ı mezkûr-ı âlât-ı merkūmenin el-yevm semen-i mislinden ezyed olduğu ihbâr olunmağla, vasî-i mezbûr Mustafa Ağa sâlifü’l-beyân âlât-ı merkūmeyi karâr-dâdesi olduğu vech üzere mezbûr el-Hâc Ahmed Ağa’ya bi’l-vesâye bey‘ ve temlîk ve teslîm, ol dahi rızâsıyla ba‘de’l-iştirâ ve’l-kabûl semeni olan meblağ-ı mezkûr üç yüz guruşu merkūm el-Hâc Ahmed Ağa yedinden bi’l-vesâye tamamen ve kâmilen ahz ü kabz edip hâlik-i mesfûrun uncu tâifesine olan deynine edâ ve mahsûb etmek üzere ta‘ahhüd eylediğini mezbûr el-Hâc Ahmed Ağa tasdîk etmeğin mâ-vaka‘a bi’t-taleb ketb olundu. Fî 23 Rebî‘ülevvel sene [1]194. Şuhûdü’l-hâl: el-Hâc Ahmed Ağa, es-Seyyid Mehmed Said, Molla Ahmed, Mehmed Ağa, Yiğitbaşı es-Seyyid Mehmed Emin.