İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 146 Hüküm no: 112 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Kirkor v. Panos’un Üsküdar Kartal’daki ekmek fırını gediğinin nısfını Kosta v. İstavri’ye iki yüz yirmi beş guruşa sattığı Mübâya‘a-i habbâz Medîne-i Üsküdar’a muzâfe kasaba-i Kartal mütemekkinlerinden olup habbâz tâifesinden olan Kirkor v. Panos nâm zimmî tarafından husûs-ı âti’z-zikri ikrâra vekîl olduğu Molla Mehmed b. el-Hâc Hasan ve Vartan v. Tomas şehâdetleriyle sâbit olan Serope v. Moses nâm zimmî meclis-i şer‘-i hatîr-i lâzımü’t-tevkīrde işbu bâ‘isü’s-sifr Kosta v. İstavri nâm zimmî muvâcehesinde bi’l-vekâle ikrâr-ı tâm ve takrîr-i kelâm edip işbu akd-i âti’z-zikrin sudûruna değin müvekkilim mesfûr Kirkor zimmînin yedinde mülkü olup zikrolunan Kartal kasabasında vâki‘ Ellialtıoğlu fırını demekle ma‘rûf bir bâb ekmekçi fırını derûnunda mevcûde beyne’l-hiref gedik [33b] ta‘bîr olunur âlât-ı lâzıme-i ma‘lûmenin nısfını tarafeynden îcâb ve kabûlü hâvî şürût-ı müfside <> ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûr Kosta zimmîye iki yüz yirmi beş guruşa bi’l-vekâle bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr iki yüz yirmi beş guruşu müşteri-i mesfûr Kosta zimmî yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsamâtdan mesfûr Kosta zimmînin bi’l-vekâle zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru ba‘de’l-kabûl nısf-ı âlât-ı mezkûrede müvekkilim mesfûr Kirkor zimmînin asla ve kat‘â alâka ve medhali kalmayup müşteri-i mesfûr Kosta zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 23 Rebî‘ülevvel sene [1]194. Şuhûdü’l-hâl: Mehmed Ağa b. ( ), Molla Ahmed, es-Seyyid Mehmed Said, el-Hâc Ahmed Ağa, Molla Mustafa, İsmail Çelebi b. Ali, Yiğitbaşı es-Seyyid Mehmed Emin.