İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 147 Hüküm no: 113 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Kirkor v. Panos’un Üsküdar Kartal’daki ekmek fırını gediğinin nısfını Hristo ve kardeşi Margarit’e iki yüz yirmi beş guruşa sattığı Mübâya‘a-i habbâz der-Kartal Medîne-i Üsküdar’a muzâfe kasaba-i Kartal mütemekkinlerinden olup habbâz tâifesinden olan Kirkor v. Panos nâm zimmî tarafından husûs-ı âti’z-zikri ikrâra vekîl olduğu Molla Mehmed b. el-Hâc Hasan ve Vartan v. Tomas şehâdetleriyle sâbit olan Serope v. Moses nâm zimmî meclis-i şer‘-i hatîr-i lâzımü’t-tevkīrde işbu bâ‘isü’s-sifr Hristo ve karındaşı Margarit nâm zimmîler muvâcehelerinde bi’l-vekâle ikrâr-ı tâm ve takrîr-i kelâm edip işbu akd-i âti’z-zikrin sudûruna değin müvekkilim mesfûr Kirkor zimmînin yedinde mülkü olup zikrolunan Kartal kasabasında vâki‘ Ellialtıoğlu fırını demekle ma‘rûf bir bâb ekmekçi fırını derûnunda mevcûde beyne’l-hiref gedik ta‘bîr olunur âlât-ı lâzıme-i ma‘lûmenin nısfını tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûrân Hristo ve Margarit zimmîlere iki yüz yirmi beş guruşa bi’l-vekâle bey‘ ve temlîk ve teslîm eylediğimde, onlar dahi ber-vech-i muharrer iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr iki yüz yirmi beş guruşu müşteriyân-ı mesfûrân Hristo ve Margarit zimmî yedlerinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsamâtdan mesfûrân Hristo ve Margarit zimmîlerin bi’l-vekâle zimmetini ibrâ-i âm ile ibrâ ve ıskāt eylediğimde, onlar dahi ibrâ-i mezkûru ba‘de’l-kabûl nısf-ı âlât-ı mezkûrede müvekkilim mesfûr Kirkor zimmînin asla ve kat‘â alâka ve medhali kalmayup müşteriyân-ı mesfûrân Hristo ve Margarit zimmîlerin mülk-i müşterâları ve hakk-ı sırfları olmuşdur, keyfe mâ yeşâ’ân ve hasbe-mâ-yahtârân mutasarrıf olsunlar dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 23 min-Rebî‘ülevvel sene [1]194. Şuhûdü’l-hâl: Şâhidûne’s-sâbıkūn.