İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 148 Hüküm no: 115 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul zimmî sıvacıları ustabaşılığına Moyisi v. Yasef’in tayin edildiği Ustabaşı nasb-ı sıvacıyân Âsitâne-i aliyye’de zimmî sıvacıların bâ-hüccet ustabaşıları olan Ohanes v. İlya nâm zimmî meclis-i şer‘-i hatîr-i lâzımü’t-tevkīrde esnâf-ı mezkûrenin ihtiyârlarından Minas v. Azerya ve Ohanes v. Karabet ve Serkiz v. Anton ve Ferhat v. Kirkor ve Karabet v. Sava ve diğer Karabet v. Vartan ve Abraham v. İlya ve Haçador v. Mardiros ve Vasil v. Sava ve Yuvan v. Kiryako ve Simyon v. Yoseb ve Marat v. Babik ve Serkiz v. Simaven ve Simyon v. Ruşen ve sâirleri hazır oldukları hâlde esnâf-ı mezkûreden bâ‘isü’s-sifr Moyisi v. Yasef nâm zimmî muvâcehesinde takrîr-i kelâm ve ta‘bîr ani’l-merâm edip esnâfımızın umûr ve mesâlihini rü’yetde acz ve tekâsülüm olduğundan ustabaşılık-ı mezbûru işbu hazır bi’l-meclis olan ustaların kudemâsından örf ve âdetlerine vâkıf ve nizâm [ve] intizâmlarını mûcib olan umûr ve ahvâllerini kemâ-yenbagī ârif ve her vechile ustabaşılık uhdesinden gelmeğe kādir ve cümlesinin muhtâr ve mu‘temedi olmağla ustabaşılık-ı mezkûru cümlesinin re’y ve ittifâkıyla mesfûr Moyisi zimmîye ferâğ ve kasr-ı yed eyledim dedikde esnâf-ı mezkûre dahi mukırr-ı mesfûru cemî‘ kelimât-ı meşrûhasında ba‘de’t-tasdîk mesfûr Moyisi zimmînin ustabaşı nasb ve ta‘yîn olunmasını iltimâs eylediklerinde, hâkim-i muvakki‘-i sadr-ı kitâb bi-tevkī‘ihi’r-refî‘ü’l-müstetâb ‒rafe‘a kadrehû mevlâhü’l-Vehhâb‒ efendi hazretleri dahi mesfûr Moyisi zimmîyi tâife-i mezbûre üzerlerine ustabaşı nasb ve ta‘yîn ve umûrlarını ber-mu‘tâd-ı kadîm rü’yet ve bir ferdi hilâf-ı şer‘-i mutahhar rencîde etmemek üzere tenbîh buyurduklarında, ol dahi kabûl ve hıdemât-i lâzımesini mahâllinde ikāmete ta‘ahhüd etmeğin mâ-vaka‘a bi’t-taleb ketb olundu. Fî 26 Rebî‘ülevvel sene [1]194. Şuhûdü’l-hâl: Mehmed Ağa b. Ahmed Kethudâ-yı muhzırân, İsmail b. Ali, Duhânî Ali Çelebi