İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 149 Hüküm no: 116 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Kürkçü Hristo v. Yorgi’nin vârislerinin alacaklı oldukları Yani v. Sori ile dört yüz elli guruşa sulh oldukları Sulh Medîne-i Üsküdar’da Yeni mahalle mütemekkinlerinden iken bundan akdem hâlik olan Kürkçü Hristo v. Yorgi zimmînin verâseti zevcesi Cevherye bt. Mihal Nasrâniye ile sulbî kebîr oğlu Petro zimmîye inhisârı tahakkukundan sonra mesfûrân Cevherye ve Petro meclis-i şer‘-i hatîr-i lâzımü’t-tevkīrde kürkçü tâifesinden bâ‘isü’s-sifr Yani v. Sori nâm zimmî muvâcehesinde her biri ikrâr-ı tâm ve takrîr-i kelâm edip mûrisimiz hâlik-i mesfûr Hristo zimmînin işbu hazır bi’l-meclis Bostânî Hüseyin Ağa b. Mehmed zimmetinde cihet-i karz-ı şer‘îden alacağı olan bin guruşa mesfûr Yani zimmî bi’l-emr ve’l-kabûl kefîl ve dâmin olmağla, meblağ-ı mezkûr bin guruşu mesfûr [34b] Yani zimmîden kefâlet-i mahkiyesine binâen taleb ve da‘vâ sadedinde olduğumuzda beynimize muslihûn tavassut edip mesfûr Yani zimmî ile dört yüz elli guruş bedel-i makbûz mukābelesinde ba‘de akdi’l-musâlaha ve’l-kabûl mâ‘adâsına ve sâire müte‘allika âmme-i de‘âvî ve mutâlebât ve kâffe-i eymân ve muhâsamâtdan bizler mesfûr Yani zimmînin zimmetini ibrâ-i âmm-ı kātı‘ü’n-nizâ‘ ve ıskāt-ı tâmm-ı râfi‘ü’l-hısâm ile ibrâ ve ıskāt, ol dahi bizlere medfû‘ı olan bedel-i sulh-ı mezkûr dört yüz elli guruşa ve sâire müte‘allika âmme-i de‘âvî ve mutâlebât ve kâffe-i eymân ve muhâsamâtdan bizim zimmetlerimizi ibrâ-i âm ile ibrâ ve ıskāt ve her birimiz âharın ber-vech-i muharrer ibrâsını kabûl eyledik <> dediklerini mesfûr Yani zimmî tasdîk etmeğin mâ-vaka‘a bi’t-taleb ketb olundu. Fî 29 Rebî‘ülevvel sene [1]194. Şuhûdü’l-hâl: Mehmed Emin Efendi, İsmail Çelebi, Hüseyin Ağa b. ( ), Molla Abdi, Molla Ali.