İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 150 Hüküm no: 117 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aci Kostantin v. Dimitri’nin Beşiktaş Ortaköy’deki mumhane gediğinin nısfını Toma v. Kosti’ye bin guruşa sattığı Mübâya‘a-i mûmhâne Tüccârdan Aci Kostantin v. Dimitri nâm zimmî meclis-i şer‘-i hatîr-i lâzımü’t-tevkīrde zikri âtî âlât-ı lâzıme-i ma‘lûmenin nısf-ı şâyi‘ine mutasarrıf olan bâ‘isü’s-sifr Toma v. Kosti nâm zimmî muvâcehesinde ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimde mülk ve hakkım olup mahrûse-i Galata’ya muzâfe kasaba-i Beşiktaş’a tâbi‘ Ortaköy’de vâki‘ bir bâb mûmhâne derûnunda mevcûde beyne’l-hiref gedik ta‘bîr olunur bir kebîr kazgan ve sâir âlât-ı lâzıme-i ma‘lûmenin nısf-ı şâyi‘ini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûr Toma zimmîye bin guruşa bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ü kabûl edip semeni olan meblağ-ı mezkûr bin guruşu yedinden bi’t-tamam ve’l-kemâl ahz ü kabz edip bey‘-i mezkûrun gabn ve tağrîrine ve bi’l-cümle husûs-ı mezkûra müte‘allika âmme-i da‘vâdan her birimiz âharın zimmetini ibrâ-i âm ile ibrâ ve ıskāt ve her birimiz âharın ber-vech-i muharrer ibrâsını kabûl eyledik. Zikr olunan âlâtın nısf-ı şâyi‘ine ve işbu bir kıt‘a gedik temessükü mantûkunca ustalar ma‘rifetiyle tevzî‘ olunan yağ hissesinden dört hisse i‘tibâriyle iki hissesine mutasarrıf olanlar ne minvâl üzere mutasarrıflar olmuşlar ise mesfûr dahi ol minvâl üzere mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 Rebî‘ülevvel sene [1]194. Şuhûdü’l-hâl: Mahmud Ağa b. Mehmed, Hasan Ağa b. Ali, Yiğitbaşı Ebûbekir b. Ömer, Numan b. Ali, İsak v. Todori, Kosti v. Piro?, Todori v. Tanaş, İlya v. İsko?.