İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 152 Hüküm no: 119 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Mustafa b. İsmail’in vârislerinin intikal eden eşyalar hususunda diğer vâris Mehmed Emin b. Mustafa üzerine açtıkları davadan vazgeçtikleri ve ibralaştıkları Sulh [ve] ibrâ Mahmiye-i İstanbul’da Cerrâhpaşa Câmi‘-i şerîfi kurbünde el-Hâc Ahmed Mahallesi sükkânından iken bundan akdem fevt olan el-Hâc Mustafa b. İsmail’in verâseti zevcesi Âişe bt. Mehmed nâm hatun ile sulbî kebîr oğulları Mehmed Emin ve Bostânî Mustafa ve sulbiye kebîre kızları Nefise ve Habibe hatunlara münhasıra oldukdan sonra mezbûr Bostânî Mustafa asâleten ve mezbûre Nefise hatunun zevci ve tarafından husûs-ı âti’z-zikrde vekîl olduğu zâtını ârifân olan es-Seyyid Ahmed Efendi b. es-Seyyid Abdullah ve Molla Hüseyin b. Mustafa şehâdetleriyle mahzar-ı hasm-ı şer‘îde sâbit olan Mehmed Ağa ve mezbûre Habibe’nin zevci ve tarafından kezâlik vekîl olduğu Mustafa b. Mehmed ve Mustafa b. Mustafa şehâdetleriyle sâbit olan Osman b. Hüseyin nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb mezbûr Mehmed Emin nâm kimesne mahzarında her biri bi’l-asâle ve bi’l-vekâle ikrâr-ı tâm ve takrîr-i kelâm edip mûrisimiz mezbûr el-Hâc Mustafa fevt oldukda ben ve kız karındaşlarım müvekkiletân-ı mezbûretân sagīreler ve mezbûr Mehmed Emin kebîr ve vasîmiz olmağla, İstanbul’da Cevâhir Bedesteni kurbünde Takyeciler Kapısı civârında vâki‘ bir bâb zenneci dükkânında mevcûde hâric-i ez-defter-i kassâm mecmû‘u beş bin guruş kıymetli ma‘lûmü’l-mikdâr kürk ve şâlî ve elbise-i sâiresini tegallüben ve müstakillen ahz ü kabz etmekle, eşyâ-i mezkûreden hisse-i irsiyemizi bi’l-asâle ve bi’l-vekâle taleb ederiz deyü tesâddî eylediğimiz da‘vâ-yı mezkûremizden meccânen fâriğler olup zikrolunan kürk ve şâlî ve elbise-i sâireye müte‘allika âmme-i de‘âvî ve mutâlebât ve kâffe-i eymân ve muhâsamâtdan bizler bi’l-asâle ve bi’l-vekâle mezbûr Mehmed Emin’in zimmetini ibrâ-i âmm-ı kātı‘ü’n-nizâ‘ ve ıskāt-ı tâmm-ı [35b] râfi‘ü’l-hısâm ile ibrâ ve ıskāt eylediğimizde, mezbûr Mehmed Emin dahi ibrâ-i mezkûru kabûl eyledi dediklerini mezbûr Mehmed Emin tasdîk etmeğin mâ-vaka‘a bi’t-taleb ketb olundu. Fî-gurre-i Rebî‘ülâhir sene [1]194. Şuhûdü’l-hâl: Tütüncü Ali Çelebi, Akşehirli Osman, Molla Mustafa b. İsmail.