İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 153 Hüküm no: 120 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım bt. Moravî Ahmed Paşa’nın Mora Gördös’deki çiftlik ve müştemilatını, hububatı ve tarlaları Halil Bey b. Abdi Bey’e toplam iki bin yedi yüz elli guruşa sattığı ve devrettiği Mübâya‘a-i çiftçi Mahmiye-i İstanbul’da Davud Paşa Mahallesi’nde sâkine fahrü’l-muhadderât Âişe Hanım bt. Moravî Ahmed Paşa’nın vekîl-i müseccel-i şer‘îsi Şerîf Mehmed Bey b. Abdülbaki meclis-i şer‘-i hatîr-i lâzımü’t-tevkīrde Mora cezîresinde Gördös kasabasında sâkin Halil Bey b. Abdi Bey tarafından husûs-ı âtiyyü’z-zikri tasdîka vekîl olduğu Ali Ağa b. Ali ve Hüseyin Efendi b. Ali nâm kimesneler şehâdetleriyle sâbit olan es-Seyyid Ahmed Ziyaeddin Efendi b. es-Seyyid Ahmed Ziyaeddin mahzarında bi’l-vekâle ikrâr-ı tâm ve takrîr-i kelâm edip işbu akd-i âti’z-zikrin sudûruna değin müvekkilem mûmâ-ileyhâ Âişe Hanım’ın yedinde mülk ve hakkı olup zikrolunan Gördös kazâsına tâbi‘ Fesleğe karyesinde vâki‘ lede’l-ahâlî ve’l-cîrân ma‘lûmü’l-hudûd ve’l-kat‘ mülk çiftçi damları ve harman yerlerini müvekkil-i mezbûr Halil Bey’e iki yüz guruşa ve çiftlik-i mezkûrede olan kırk yedi keyl hınta ve otuz sekiz keyl şa‘îrini kezâlik iki yüz guruşa müvekkil-i mûmâ-ileyh Halil Bey ile ale’l-iştirâk mutasarrıf olduğu bir bâb su değirmeninde olan nısf hisse-i şâyi‘asını üç yüz elli guruşa tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ile bi-safka-i vâhide müvekkil-i mûmâ-ileyh Halil Bey’e bey‘ ve temlîk ve teslîm ve çiftlik-i mezkûra tâbi‘ dört çifte mütehammil ma‘lûmü’l-mikdâr tarlalarını dahi iki bin guruş bedel mukābelesinde bâ-ma‘rifet-i sahib-i arz müvekkil-i merkūm Halil Bey’e ferâğ ve tefvîz eylediğinde, ol dahi zikrolunan çiftçi damlarını ve hubûbât-ı mezkûre ile nısf su değirmenini ber-vech-i muharrer iştirâ ve temellük ve tesellüm ve kabz ve kabûl ve sâlifü’z-zikr tarlaları dahi ber-vech-i muharrer tefevvüz ve kabûl edip semen-i mezkûr yedi yüz elli guruş ile bedel-i merkūm iki bin guruşu vekîl-i mûmâ-ileyh es-Seyyid Ahmed Ziyaeddin Efendi yedinden bi’t-tamam ve’l-kemâl ahz ve kabz edip, ba‘de’l-yevm emlâk-i mezkûre ile arâzî-i merkūmede müvekkilem mûmâ-ileyhâ Âişe Hanım’ın asla ve kat‘â alâka ve medhali kalmayup zikrolunan çiftçi damları ve hubûbât-ı mezkûre müşteri-i müvekkil-i mûmâ-ileyh Halil Bey’in emlâk-i müşterâsı ve hakk-ı sırfı ve sâlifü’l-beyân tarlalar emlâk-i müfevvezi olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 Rebî‘ülâhir sene [1]194. Şuhûdü’l-hâl: Yusuf Bey, Mustafa Ağa b. Mehmed, es-Seyyid Mustafa Kapudan b. es-Seyyid Hasan, Tüfengçi Mehmed Ağa.