İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 154 Hüküm no: 121 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Agop v. Zöhrab’ın Beşiktaş Ortaköy’deki ekmek fırını ve değirmenin altı hissesini oğlu Avadik’e bin beş yüz guruşa sattığı Mübâya‘a-i habbâz Mahrûse-i Galata’ya muzâfe Beşiktaş nâhiyesine tâbi‘ Ortaköy’de habbâz olan Agop v. Zöhrab tarafından husûs-ı âti’z-zikri ikrâra vekîl olduğu Avanes v. Ağyazar ve Minas v. Haçuk nâm zimmîler şehâdetleriyle sâbit olan Mıgırdıç v. Anton nâm zimmî meclis-i şer‘-i hatîr-i lâzımü’t-tevkīrde müvekkil-i mesfûrun oğlu bâ‘isü’s-sifr Avadik muvâcehesinde bi’l-vekâle ikrâr-ı tâm ve takrîr-i kelâm edip işbu akd-i âtiyyü’z-zikrin sudûruna değin müvekkil-i mesfûr Agop zimmînin yedinde mülk ve hakkı olup karye-i mezbûrede vâki‘ Kebîr Fırın demekle meşhûr bir bâb ekmekçi fırını ve ona merbût derûnunda kâin yirmi sehim i‘tibâriyle beş horoslu bir bâb değirmende mevcûde beyne’l-esnâf gedik ta‘bîr olunur yirmi re’s bargir ve sâir âlât-ı lâzıme-i ma‘lûmeden mutasarrıf olduğu on üç buçuk re’s bargirin yedi buçuk re’sini kendi yedinde ibkā, bâkīsi olan altı re’s bargir ve altı re’s bargire isâbet eden sâir âlât-ı lâzıme-i ma‘lûmesini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile oğlu mesfûr Avadik zimmîye bin beş yüz guruşa bey‘ ve temlîk ü teslîm eylediğinde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr bin beş yüz guruşu oğlu mesfûr [36a] Avadik zimmî yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve istifâ-i semene müte‘allika âmme-i de‘âvî ve mutâlebât ve kâffe-i eymân ve muhâsamâtdan oğlu mesfûr Avadik zimmînin zimmetini ibrâ-i âm ile ibrâ ve ıskāt eylediğinde, ol dahi ibrâ-i mezkûru ba‘de’l-kabûl fîmâ-ba‘d zikrolunan altı re’s bargir ve altı re’s bargire isâbet eden sâir âlât-ı lâzıme-i ma‘lûmede müvekkilim mesfûr Agop zimmînin asla ve kat‘â alâka ve medhali kalmayup oğlu müşteri-i mesfûr Avadik zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 9 Rebî‘ülâhir sene [1]194. Şuhûdü’l-hâl: el-Hâc Ahmed Ağa, es-Seyyid Mehmed Said, Uncular Kethudâsı Mustafa, Çörekçi Molla Ahmed, Yiğitbaşı es-Seyyid Mehmed Emin, Mikail v. İstefan, Vartan v. Tomas, Bedros v. Agop.