İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 155 Hüküm no: 122 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habibe Hatun’un boşandığı Ahmed Ağa b. Mehmed ile eşyalar hususunda birbirlerinin zimmetlerini ibra ettikleri Zevciyetden ibrâ Mahmiye-i İstanbul’da ( ) Mahallesi’nde sâkine zâtı zeyl-i kitâbda muharrerü’l-esâmî Müslimîn ta‘rifleriyle mu‘arrefe olan Habibe bt. ( ) nâm hatun meclis-i şer‘-i hatîr-i lâzımü’t-tevkīrde zevc-i mutallıkı işbu bâ‘isü’l-kitâb Ahmed Ağa b. Mehmed nâm kimesne mahzarında ikrâr-ı tâm ve takrîr-i kelâm edip mezbûr Ahmed Ağa bundan akdem Mahmudpaşa Mahkemesinde bana hükmettirdiği dokuz sahan ve bir çorba tası ve iki güğüm ve bir sofra ve peşgîr ve üç yorgan ve bir kebîr âbdest leğeni ve bir âbdest ibriği ve bir kebîr sinisini, ben mezbûr Ahmed Ağa’ya tamamen def‘ ü teslîm, ol dahi yedimden ba‘de’l-ahz ve’l-kabz ben dahi eşyâ-i memlûkemden mezbûr Ahmed Ağa yedinde mahkûmun-bih olan on üç yasdık ve üç minder ve bir şilte ve iki hatâî koltuk yasdığı ve üç çuka mak‘ad ve iki yorgan ve iki mücessem yüz yasdığı ve bir orta keçesi ve bir kazgan ve bir âbdest leğeni ve bir âbdest ibriği ve bir tâbemi bana def‘ ü teslîm, ben-dahi yedinden ahz ü kabz edip husûs-ı mezkûra ve ibtidâ’-i zevciyetden işbu târih-i kitâba gelince beynimizde cereyân eden cemî‘ mu‘âmelâta müte‘allika âmme-i de‘âvî ve mutâlebât ve kâffe-i eymân ve muhâsamâtdan ben mezbûr Ahmed Ağa’nın zimmetini ibrâ-i âm ile ibrâ ve ıskāt, ol dahi kezâlik ibtidâ’-i zevciyetden işbu târihe gelince beynimizde cereyân eden cemî‘ mu‘âmelâta müte‘allika âmme-i de‘âvî ve kâffe-i mutâlebâtdan benim zimmetimi ibrâ-i âm ile ibrâ ve ıskāt ve her birimiz âharın ber-vech-i muharrer ibrâsını kabûl eyledik dediğini mezbûr Ahmed Ağa şifâhen ve vicâhen tasdîk etmeğin mâ-vaka‘a bi’t-taleb ketb olundu. Fî 14 Rebî‘ülâhir sene [1]194. Şuhûdü’l-hâl: el-Hâc Ömer Efendi b. ( ), el-Hâc Ahmed, Emir Mehmed, Elvan Câmi‘i İmâmı Halil Efendi, Feyzullah Ağa, Molla Ahmed, Molla Yahya.