İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 155 Hüküm no: 123 Orijinal metin no: [36a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kefeli Mahallesi’ndeki horasancı dükkânı ustası Hacasar v. Ağyazar’ın yetmiş altı guruş seksen akçe malından ve ustalığından terkini ikrâr ve kendisine aylık on iki guruş verilmeye taahhüd Mahmiye-i İstanbul’da Sultân Hamamı kurbünde Kefeli Mahallesi’nde vâki‘ horasancı dükkânında yetmiş altı guruş seksen akçe re’s-i mâlı olup dükkân-ı mezkûrda ustalığı olan Hacasar v. Ağyazar nâm zimmî meclis-i şer‘-i hatîr-i lâzımü’t-tevkīrde karındaşı İstefan zimmî ile Minasagan v. Melkon nâm zimmîler muvâcehelerinde takrîr-i kelâm ve ta‘bîr ani’l-merâm edip dükkân-ı mezkûrda re’s-i mâlım olup zikrolunan yetmiş altı guruş seksen akçemi dükkân-ı mezkûrda terk ve târih-i kitâbdan dört sene tamamına değin ustalığımdan keff-i yed edip re’s-i mal-ı mezkûru mesfûrân Hacasar [İstefan] ve Minasagan zimmîler i‘mâl ve ustalığımı zabt ve beynimizde cârî şürût-ı kadîmemiz üzere beher şehir on ikişer guruşdan senede yüz kırk dörder guruş bana vermeğe ta‘ahhüd ve beni bu vechile tatyîb ve taltîf eylediklerinde, ben-dahi ber-vech-i muharrer rızâ [râzî] oldum dedikde mesfûrân İstefan ve Minasagan zimmîler dahi mesfûr Hacasar zimmînin dükkân-ı mezkûrda ol mikdâr re’s-i mâlı ve ustalığı olduğunu ikrâr ve i‘tirâf ve beynlerinde cârî şürût-ı kadîme-i mer‘iyye-i mu‘tebereleri üzere beher şehir on ikişer guruşdan senede yüz kırk dörder guruşu mesfûr Hacasar zimmîye vermeğe ta‘ahhüd etmeleriyle hıfzan li’l-makāl işbu vesîka ketb ü imlâ ve yedine i‘tâ olundu. Fî 15 Rebî‘ülâhir sene [1]194. Şuhûdü’l-hâl: Taşçıbaşı Ahmed Ağa, Ali Usta b. Hamza, Başkapıkethudâsı Mehmed b. Ali, Hâfız Osman b. Osman, Müezzin Mehmed Salih Efendi, Horasancı kâhyası Anton v. Matos, Yiğitbaşı Minas v. Asvadur, Begos v. Kirkor, Kazer v. Sahak, David v. Karabet.