İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 156 Hüküm no: 124 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Kirkor v. Avanes’in Avratpazarı’ndaki ekmek fırını ve değirmenin sekiz hissesini Ahram v. Mircan’a beş yüz guruşa sattığı Mübâya‘a-i habbâz İstanbul’da Avratpazarı fırını demekle ma‘rûf bir bâb ekmekçi fırını ve ittisâlinde vâki‘ yirmi dört sehim i‘tibâr olunan dört horoslu bir bâb değirmende olup beyne’l-esnâf gedik ta‘bîr olunan ma‘lûmü’l-mikdâr bargir ve âlât-ı lâzıme-i sâirenin sekiz sehmine mutasarrıf olan Kirkor v. Avanes nâm zimmî meclis-i şer‘-i hatîr-i lâzımü’t-tevkīrde habbâz tâifesinden bâ‘isü’s-sifr Ahram v. Mircan nâm zimmî muvâcehesinde ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimde mülk ve hakkım olup zikrolunan sekiz sehim bargir ve âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile mesfûr Ahram zimmîye beş yüz guruşa bey‘ ü temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr beş yüz guruşu mesfûr Ahram zimmî yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mesfûr Ahram zimmînin zimmetini ibrâ-i âm ile ibrâ ve ıskāt eylediğimde, ol dahi ber-vech-i muharrer ibrâ-i mezkûru kabûl edip fîmâ-ba‘d zikrolunan ma‘lûmü’l-mikdâr bargir ve âlât-ı lâzıme-i ma‘lûmenin sekiz sehminde benim asla ve kat‘â alâka ve medhalim kalmayup müşteri-i mesfûr Ahram zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 Rebî‘ülâhir sene [1]194. Şuhûdü’l-hâl: el-Hâc Ahmed Ağa, es-Seyyid Mehmed Said Çelebi, Çörekçi Molla Ahmed, Yiğitbaşı es-Seyyid Mehmed Emin, Uncular Kethudâsı Mustafa Ağa.