İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 157 Hüküm no: 125 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahram v. Mircan’ın Avratpazarı’ndaki ekmek fırını ve değirmenin sekiz hissesini Kirkor v. Avanes’e beş yüz guruşa sattığı Mübâya‘a-i habbâz İstanbul’da Avratpazarı’nda paçacı ittisâlinde vâki‘ yirmi dört sehim i‘tibâr olunan dört horoslu bir bâb uncu değirmeninde olup beyne’l-hiref gedik ta‘bîr olunur ma‘lûmü’l-mikdâr bargir ve âlât-ı lâzıme-i sâirenin sekiz sehmine mutasarrıf olan Ahram v. Mircan nâm zimmî meclis-i şer‘-i hatîr-i lâzımü’t-tevkīrde değirmen-i mezkûrun sekiz sehmine mutasarrıf olan bâ‘isü’s-sifr Kirkor v. Avanes nâm zimmî muvâcehesinde ikrâr-ı tâm ve takrîr-i kelâm edip işbu akd-i âtiyyü’z-zikrin sudûruna değin yedimde mülk ve hakkım olup zikrolunan sekiz sehim bargir ve âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile mesfûr Kirkor zimmîye beş yüz guruşa bey‘ ü temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ettikden sonra semeni olan meblağ-ı mezkûr beş yüz guruşu müşteri-i mesfûr Kirkor zimmî yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mesfûr Kirkor zimmînin zimmetini ibrâ-i âm ile ibrâ ve ıskāt eylediğimde, ol dahi ber-vech-i muharrer ibrâ-i mezkûru kabûl edip fîmâ-ba‘d zikrolunan ma‘lûmü’l-mikdâr bargir ve âlât-ı lâzıme-i ma‘lûmenin sekiz sehminde benim asla ve kat‘â alâka ve medhalim kalmayup müşteri-i mesfûr Kirkor zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 Rebî‘ülâhir sene [1]194. Şuhûdü’l-hâl: el-Hâc Ahmed Ağa, es-Seyyid Mehmed Said Çelebi, Yiğitbaşı es-Seyyid Mehmed Emin, Uncular Kethudâsı Mustafa Ağa, Çörekçi Molla Ahmed, Mikail v. İstefan, Vartan v. Tomas, Bedros v. Begos, Serkiz v. Bedros.