İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 158 Hüküm no: 126 Orijinal metin no: [36b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alacacı Vasil v. Avanes’in Cevahir Bedesteni’ndeki bezzaz dükkânı gediğinin nısfını Bedros v. Mardiros’a altı yüz guruşa sattığı Mübâya‘a-i âlât-ı bezzâz İstanbul’da vâki‘ bezzâz ta‘bîr olunur yetmiş bir aded dekâkîne mahsûs alacacı esnâfından Vasil v. Avanes nâm zimmî meclis-i şer‘-i hatîr-i lâzımü’t-tevkīrde sarrâf tâifesinden işbu bâ‘isü’s-sifr Bedros v. Mardiros nâm zimmî muvâcehesinde ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimde mülk ve hakkım olup İstanbul’da Cevâhir Bedesteni’nin Sahâflar Kapısı kurbünde kâin bir bâb alaçacı dükkânı derûnunda mevcûde beyne’l-esnâf gedik ta‘bîr [olunur] mutasarrıf olduğum nısf hisse-i âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müşteri-i mesfûr Bedros zimmîye altı yüz guruşa bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm [37a] ve kabz kabûl etmekle semeni olan meblağ-ı mezkûr altı yüz guruşu müşteri-i mesfûr Bedros zimmî yedinden bi’t-tamam ve’l-kemâl ahz ü kabz edip fîmâ-ba‘d zikrolunan nısf hisse-i âlât-ı lâzımede benim asla ve kat‘â alâka ve medhalim kalmayup müşteri-i mesfûr Bedros zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 min-şehri Rebî‘ülâhir sene [1]194. Şuhûdü’l-hâl: Mehmed Ağa Muhzırân-ı Kethudâ, İsmail Çelebi b. Ali, Ahıskavî Mehmed Çelebi el-Muhzır, Parsadan v. İstefan, İstefan v. İsayi, Arutin v. Mihail, Azoz v. Tamras, Abraham v. Agop.