İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 158 Hüküm no: 127 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Maruk v. Kasber’in Eyüp Taşlıburun’daki francalacı fırını ve değirmenin dört hissesini Kirkor v. Vartan ile Kigork v. Kasber’e bin guruşa sattığı Mübâya‘a-i habbâz Habbâz tâifesinden Maruk v. Kasber nâm zimmî meclis-i şer‘-i hatîr-i lâzımü’t-tevkīrde işbu bâ‘isü’l-vesîka Kirkor v. Vartan ve Kigork v. Kasber nâm zimmîler mahzarlarında ikrâr-ı tâm ve takrîr-i kelâm edip Medîne-i Hazret-i Ebâ Eyyûb-i Ensârî ‒radıye anhü Rabbühi’l-Bârî‒’de Taşlıburun nâm mahâlde vâki‘ bir bâb francalacı fırını ve ona merbût dört horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur on altı re’s bargir ve sâir âlât-ı lâzıme-i ma‘lûmenin on altı sehim i‘tibâriyle yedimde mülk ve hakkım olan dört sehmi ifrâz ve kemâl-i imtiyâz ile mümtâz edip mesfûrân Kirgor ve Kigork zimmîlerden iktirâz ve kabz eylediğim bin guruş mukābelesinde âlât-ı mezkûrenin i‘tibâr-ı merkūm üzere dört sehm-i şâyi‘ini tarafeynden îcâb ve kabûlü hâvî alâ-tarîkı’l-istiğlâl mesfûrân Kirgor ve Kigork zimmîlere bin guruşa bey‘ ü teslîm eylediğimde, onlar dahi ber-vech-i muharrer iştirâ ve tesellüm ve kabûl edip ve meblağ-ı mezkûr bin guruşu mesfûrân Kirkor ve Kigork zimmîlerin yedlerinden bi’t-tamam ve’l-kemâl ahz ü kabz eylediğimden sonra mesfûrân Kirkor ve Kigork zimmîler sâlifü’l-beyân dört sehm âlât-ı mezkûreyi gıbbe’t-tahliyeti’ş-şer‘iyye ve’t-takābuzi’l-mer‘î târih-i kitâbdan beher şehr on ikişer buçuk guruşdan bir sene tamamına değin yüz elli guruşa bana îcâr ve teslîm ben-dahi vech-i muharrer üzere istîcâr ve kabûl eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 21 Rebî‘ülâhir sene [1]194. Şuhûdü’l-hâl: Yiğitbaşı es-Seyyid Mehmed Emin, es-Seyyid el-Hâc Ahmed, el-Hâc Ahmed Ağa b. Hüseyin, Hâfız Mustafa, Uncular Yiğitbaşısı el-Hâc Abdullah, Habbâzân Kethudâsı İsmail Ağa, Mikail v. İstefan, Vartan v. Tomas, Bedros v. Begos, Ahram v. Kaspar, Serkiz v. Aleksan, Matos v. Ağyazar.