İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 164 Hüküm no: 133 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Yani’nin Altımermer’deki ekmekçi fırını ve değirmenin dört hissesini borçlularına ödemek üzere Miho v. Kava’ya sekiz yüz guruşa sattığı Mübâya‘a-i habbâz Sâbıkā habbâz tâifesinden Yani v. ( ) nâm zimmî meclis-i şer‘-i hatîr-i lâzımü’t-tevkīrde habbâz tâifesinden bâ‘isü’s-sifr Miho v. Kava nâm zimmî muvâcehesinde ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimde mülküm olup İstanbul’da Altımermer’de vâki‘ bir bâb habbâz fırını derûnunda kâin yirmi dört sehim i‘tibâr olunur altı horoslu bir bâb değirmende mevcûde beyne’l-hiref gedik ta‘bîr olunur yirmi dört re’s bargire ve sâir âlât-ı lâzıme-i ma‘lûmeden mutasarrıf olduğum dört re’s bargir ve dört re’s bargire isâbet eden âlât-ı ma‘lûmemi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûr Miho zimmîye sekiz yüz guruşa bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr sekiz yüz guruşu cânib-i mîrîye ve Kapan tüccârından ma‘lûmü’l-esâmî kimesnelere hınta semeninden olan deynine vermek üzere mesfûr Miho zimmîye emreylediğimde, ol dahi meblağ-ı merkūmu düyûnum ashâbına vermek üzere ta‘ahhüd etmeğin, bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mesfûr Miho zimmînin zimmetini ibrâ-i âm ile ibrâ ve ıskāt, ol dahi ibrâ-i mezkûru ba‘de’l-kabûl zikrolunan dört re’s bargir ve dört re’s bargire isâbet eden sâir âlât-ı lâzıme-i ma‘lûmede benim asla ve kat‘â alâka ve medhalim kalmayup müşteri-i mesfûr Miho zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurre-i Cumâdelûlâ sene [1]194. Şuhûdü’l-hâl: Habbâz[ân] Kethudâsı İsmail Ağa, es-Seyyid el-Hâc Ahmed, Yiğitbaşı es-Seyyid Mehmed Emin Ağa, Sayıcı Molla Osman, es-Seyyid Mehmed Said Ağa, es-Seyyid el-Hâc Ahmed Ağa.