İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 165 Hüküm no: 134 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamide bt. Ali’nin İstinye Büyükdere’deki ekmekçi fırını gediğinin üçte birini Mıgırdıç v. Begos’a üç yüz guruşa sattığı Mübâya‘a-i habbâz Mahrûse-i Galata’ya muzâfe Fındıklı kasabasında sâkine Hamide bt. el-Hâc Ali nâm hatun tarafından husûs-ı âtiyyü’z-zikrde vekîl olduğu zâtını ârifân es-Seyyid İsmail b. es-Seyyid el-Hâc İbrahim ve Hâfız Molla Mustafa b. el-Hâc Abdi nâm kimesneler şehâdetleriyle sâbit olan el-Hâc Ahmed Ağa b. Hüseyin nâm kimesne meclis-i şer‘-i hatîr-i lâzımü’t-tevkīrde habbâz tâifesinden işbu bâ‘isü’s-sifr Mıgırdıç v. Begos muvâcehesinde bi’l-vekâle ikrâr-ı tâm ve takrîr-i kelâm edip işbu akd-i âtiyyü’z-zikrin sudûruna değin müvekkilem mezbûre Hamide Hatun’un yedinde mülkü olup mahrûse-i mezbûreye muzâfe İstinye nâhiyesine tâbi‘ Büyükdere karyesinde vâki‘ bir bâb ekmekçi fırını derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin sülüs-i şâyi‘ini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûr Mıgırdıç zimmîye üç yüz guruşa bey‘ ü temlîk ve teslîm eylediğinde, ol dahi ber-vech-i muharrer iştirâ ve temellük ve tesellüm ve kabz ve kabûl ettikden sonra semen-i meblağ-ı mezkûr üç yüz guruşu müşteri-i mesfûr Mıgırdıç zimmî yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mesfûr Mıgırdıç zimmînin zimmetini ibrâ-i âm ile ibrâ ve ıskāt, ol dahi ibrâ-i mezkûru kabûl edip fîmâ-ba‘d âlât-ı lâzıme-i ma‘lûmenin sülüs-i şâyi‘inde müvekkilem mezbûre Hamid Hatun’un asla ve kat‘â alâka ve medhali kalmayup müşteri-i mesfûr Mıgırdıç zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurre-i Cumâdelûlâ sene [1]194. Şuhûdü’l-hâl: eş-Şâhidûne’s-sâbıkūn.