İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 166 Hüküm no: 135 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Kava v. Liko’nun Altımermer’deki ekmekçi fırını ve değirmenin bir hissesini Yefko v. Patso’ya iki yüz guruşa sattığı Mübâya‘a-i habbâz Habbâz tâifesinden Kava v. Liko nâm zimmî tarafından husûs-ı âti’z-zikrde vekîl olduğu Abdullah Beşe b. Ali ve Receb Beşe b. Osman şehâdetleriyle sâbit olan es-Seyyid Mehmed Emin b. Ahmed nâm kimesne meclis-i şer‘-i hatîr-i lâzımü’t-tevkīrde zikri câ’î Altımermer fırını ve değirmeninde bir re’s bargire mutasarrıf olan Yefko v. Patso nâm zimmînin vekîl-i müseccel-i şer‘îsi el-Hâc Ahmed Ağa b. Hüseyin Ağa mahzarında bi’l-vekâle ikrâr-ı tâm ve takrîr-i kelâm edip işbu akd-i âti’z-zikrin sudûruna değin müvekkilim mesfûr Kava zimmînin yedinde mülkü olup sâlifü’z-zikr Altımermer’de vâki‘ bir bâb habbâz fırını ve derûnunda kâin yirmi dört sehim i‘tibâr olunur altı horoslu bir bâb değirmende mevcûde beyne’l-hiref gedik ta‘bîr olunur bir re’s bargir ve sâir âlât-ı lâzıme-i ma‘lûmeden mutasarrıf olduğum bir re’s bargir ve bir re’s bargire isâbet eden sâir âlât-ı lâzıme-i ma‘lûmesini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkil-i mesfûr Yefko zimmî içün vekîl-i merkūm el-Hâc Ahmed Ağa’ya iki yüz guruşa bi’l-vekâle bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ve kabûl ettikden sonra semeni olan meblağ-ı mezkûr iki yüz guruşu hınta bahâsından cânib-i mîrîye olan deynine vermek üzere merkūm el-Hâc Ahmed Ağa’ya bi’l-vekâle emreylediğimde, ol dahi meblağ-ı merkūmu cânib-i mîrîden kabza me’mûra vermek üzere ta‘ahhüd etmeğin, bey‘-i mezkûrun tağrîr ve gabnine ve istifâ-i semene ve gedik husûsuna müte‘allika âmme-i de‘âvî ve kâffe-i mutâlebâtdan vekîl-i merkūm el-Hâc Ahmed Ağa ile müvekkil-i mesfûr Yefko zimmînin zimmetini ibrâ-i âm ile ibrâ ve ıskāt, ol dahi bi’l-vekâle ibrâ-i mezkûru ba‘de’l-kabûl zikrolunan bir re’s bargir ve bir re’s bargire isâbet eden sâir âlât-ı lâzıme-i ma‘lûmede müvekkilim mesfûr Kava zimmînin asla ve kat‘â alâka ve medhali kalmayup müşteri-i müvekkil-i mesfûr Yefko zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurre-i Ca sene [11]94. Şuhûdü’l-hâl: Şâhidûne’s-sâbıkūn.