İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 167 Hüküm no: 136 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Kava v. Liko’nun Altımermer’deki ekmekçi fırını ve değirmenin bir hissesini borçlularına ödemek üzere Yefko v. Patso’ya iki yüz guruşa sattığı Mübâya‘a-i habbâz Habbâz tâifesinden Miho v. Kava nâm zimmî meclis-i şer‘-i hatîr-i lâzımü’t-tevkīrde Yefko v. Patso nâm zimmînin husûs-ı âti’z-zikrde vekîl-i müsecceli el-Hâc Ahmed Ağa b. Hüseyin Ağa muvâcehesinde bi-tav‘ihî ikrâr-ı tâm ve takrîr-i kelâm edip Altımermer’de vâki‘ bir bâb habbâz fırını derûnunda kâin yirmi dört sehim i‘tibâr olunur altı horoslu değirmen derûnunda mevcûde yirmi dört re’s bargirden mutasarrıf olduğum dört re’s bargirin üç re’sini yedimde ibkā ve bir re’s bargir ile bir re’s bargire isâbet eden sâir âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkil-i mesfûr Yefko zimmî içün vekîl-i merkūm el-Hâc Ahmed Ağa’ya iki yüz guruşa kat‘ıyen bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ve kabûl ettikden sonra semeni olan meblağ-ı mezkûr iki yüz guruşu hınta bahâsından cânib-i mîrîye olan deynime vermek üzere merkūm el-Hâc Ahmed Ağa’ya ver deyü emreylediğimde, ol dahi meblağ-ı merkūmu emr-i mezkûruma binâen cânib-i mîrîden kabza me’mûra vermek üzere ta‘ahhüd etmeğin, [40a] bey‘-i mezkûrun tağrîr ve gabnine ve istifâ-i semene müte‘allika âmme-i de‘âvî ve kâffe-i mutâlebâtdan vekîl-i merkūm el-Hâc Ahmed Ağa ile müvekkil-i mesfûr Yefko zimmînin zimmetini ibrâ-i âm ile ibrâ ve ıskāt, ol dahi bi’l-vekâle ibrâ-i mezkûru ba‘de’l-kabûl zikrolunan bir re’s bargir ve bir re’s bargire isâbet eden sâir âlât-ı lâzıme-i ma‘lûmede benim asla ve kat‘â alâka ve medhalim kalmayup müvekkil-i mesfûr Yefko zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurre-i Ca sene [11]94. Şuhûdü’l-hâl: Şâhidûne’s-sâbıkūn.