İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 169 Hüküm no: 138 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Salih Beşe b. Ahmed ve ortaklarının Balıkpazarı’ndaki ekmek fırını ve değirmenin iki ve iki üçte bir hisselerini Receb Beşe b. Osman’a yedi yüz elli guruşa sattıkları Mübâya‘a-i habbâz Habbâz tâifesinden Salih Beşe b. Ahmed kendi tarafından asâleten ve şerîkleri Fazlı Beşe b. Hüseyin ve Tanaş v. Novak tarafından husûs-ı âti’z-zikrde vekîl olduğu Hüseyin Beşe b. Mehmed ve Bayram Usta b. İlyas nâm kimesneler şehâdetleriyle sâbit olmağla vekâleten meclis-i şer‘-i hatîr-i lâzımü’t-tevkīrde habbâz tâifesinden bâ‘isü’l-kitâb Receb Beşe b. Osman mahzarında bi’l-asâle ve bi’l-vekâle ikrâr-ı tâm ve takrîr-i kelâm edip işbu akd-i âti’z-zikrin sudûruna değin ale’l-iştirâki’s-seviy yedimizde mülk ve hakkımız olup İstanbul’da Balık Pazarı dâhilinde vâki‘ bir bâb habbâz fırını ve ittisâlinde kâin on altı sehim i‘tibâr olunup beyne’l-hiref gedik ta‘bîr olunan on altı re’s bargirden mutasarrıf olduğumuz iki re’s ve iki sülüs re’s bargir ve sâir âlât-ı lâzıme-i ma‘lûmede olan hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr Receb Beşe’ye yedi yüz elli guruşa bi’l-asâle ve bi’l-vekâle bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ve kabûl ettikden sonra semeni olan meblağ-ı mezkûr yedi yüz elli guruşu müşteri-i mezbûr Receb Beşe yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mezbûr Receb Beşe’nin zimmetini bi’l-asâle ve bi’l-vekâle ibrâ-i âm ile ibrâ ve ıskāt eylediğimde, ol dahi ibrâ-i mezkûru ba‘de’l-kabûl zikrolunan iki re’s ve iki sülüs bargir ile iki re’s ve iki sülüs bargire isâbet eden sâir âlât-ı lâzıme-i ma‘lûmede benim ve müvekkillerim mezbûrânın asla ve kat‘â alâka ve medhalimiz kalmayup müşteri-i mezbûr Receb Beşe’nin mülk-i müşterâsı ve hakk-ı sırfı olmuşdur, keyfe mâ yeşâ’ <> ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 min-Cumâdelûlâ sene [1]194. Şuhûdü’l-hâl: eş-Şâhidûne’s-sâbıkūn.