İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 170 Hüküm no: 139 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi İstamo ve Patso v. Yuvan kardeşlerin Balıkpazarı’ndaki ekmek fırını ve değirmenin iki ve iki üçte bir hisselerini Süleyman Beşe b. Ömer’e yedi yüz elli guruşa sattıkları Mübâya‘a-i habbâz Habbâz tâifesinden İstamo ve Patso veledey Yuvan nâm zimmîler taraflarından husûs-ı âtiyyü’z-zikrde vekîl olduğu Hüseyin Beşe b. Mehmed ve Bayram Usta b. İlyas nâm kimesneler şehâdetleriyle sâbit olan Salih Beşe b. Ahmed nâm kimesne meclis-i şer‘-i hatîr-i lâzımü’t-tevkīrde habbâz tâifesinden bâ‘isü’l-kitâb Süleyman Beşe b. Ömer mahzarında ikrâr-ı tâm ve takrîr-i kelâm edip işbu akd-i âtiyyü’z-zikrin sudûruna değin müvekkillerim mezbûrânın yedlerinde mülkleri olup İstanbul’da Balıkpazarı dâhilinde vâki‘ bir bâb habbâz fırını ve ittisâlinde kâin on altı sehim i‘tibâr olunup beyne’l-hiref gedik ta‘bîr olunan on altı re’s bargirden mutasarrıf oldukları iki re’s ve iki sülüs re’s bargir ve sâir âlât-ı lâzıme-i ma‘lûmelerini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr Süleyman Beşe’ye yedi yüz elli guruşa bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ve kabûl ettikden sonra semeni olan meblağ-ı mezkûr yedi yüz elli guruşu müşteri-i mezbûr Süleyman Beşe yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mezbûr Süleyman’ın zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru ba‘de’l-kabûl zikrolunan iki re’s ve iki sülüs bargir ile iki re’s ve iki sülüs bargire isâbet eden sâir âlât-ı lâzıme-i ma‘lûmede müvekkillerim mesfûrânın asla ve kat‘â alâka ve medhalleri kalmayup müşteri-i mezbûr Süleyman Beşe’nin mülk-i müşterâsı ve hakk-ı sırfı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 Cumâdelûlâ sene [1]194. Şuhûdü’l-hâl: eş-Şâhidûne’s-sâbıkūn.