İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 171 Hüküm no: 140 Orijinal metin no: [40b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Kalyoz v. Zakar’ın Kumkapı Nişancası’ndaki ekmek fırını ve değirmenin sekiz hissesini Kirkor v. Kigor, Avanes v. Kasber ile Kapril v. Haçuk’a dört bin guruşa sattığı Mübâya‘a-i habbâz Habbâz tâifesinden Kalyoz v. Zakar nâm zimmî meclis-i şer‘-i hatîr-i lâzımü’t-tevkīrde zikri âtî fırın ve değirmende sekiz re’s bargire mutasarrıf olan Kirkor v. Kigork zimmî ile kezâlik sekiz re’s bargire mutasarrıfân olan Avanes v. Kasber ve Kapril v. Haçuk nâm zimmîler [muvâcehesinde] [41a] ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimde mülküm olup İstanbul’da Kumkapı Nişancası fırını demekle ma‘rûf bir bâb ekmekçi fırını ve ona merbût ittisâlinde vâki‘ yirmi dört sehim i‘tibâr olunan yirmi dört re’s bargirden mutasarrıf olduğum sekiz re’s bargir ve sekiz re’s bargire isâbet eden sâir âlât-ı lâzıme-i ma‘lûmeden dört re’s bargiri âlât-ı lâzıme-i ma‘lûmesiyle mesfûr Kirkor zimmîye iki bin guruşa ve dört re’s bargiri kezâlik sâir âlât-ı lâzıme-i ma‘lûmesiyle mesfûrân Avanes ve Kapril zimmîlere tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile iki bin guruşa bey‘ ve temlîk ve teslîm eylediğimde, onlar dahi ber-vech-i muharrer iştirâ ve temellük ve tesellüm ve kabz ü kabûl edip semenleri olan meblağ-ı mezkûrun iki bin guruşunu mesfûr Kirkor ve iki bin guruşunu dahi mesfûrân Avanes ve Kapril zimmîlerden bi’t-tamam ve’l-kemâl ahz ü kabz edip meblağ-ı [mebî‘-i] mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mesfûrûn Kirkor ve Avanes ve Kapril zimmîlerden her birinin zimmetlerini ibrâ-i âm ile ibrâ ve ıskāt eylediğimde, onlar dahi ibrâ-i mezkûru ba‘de’l-kabûl zikrolunan sekiz re’s bargir ve sekiz re’s bargire isâbet eden sâir âlât-ı lâzıme-i ma‘lûmede benim asla ve kat‘â alâka ve medhalim kalmayup mesfûrûn Kirkor ve Avanes ve Kapril zimmîlerin mülk-i müşterâları ve hakk-ı sırfları olmuşdur, keyfe mâ yeşâ’ûn ve yahtârûn mutasarrıf olsunlar dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 Cumâdelûlâ sene [1]194. Şuhûdü’l-hâl: eş-Şâhidûne’s-sâbıkūn.