İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 171 Hüküm no: 141 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kızıltaş Mahallesi’ndeki Eğercibaşı Mehmed Ağa Vakfı’na ait su çeşmesini tamir ettiren ve yenileten mütevellî için keşif ve masraf tahmin vesikası Tekmîl-i keşf-i çeşme Mahmiye-i İstanbul’da Kızıltaş Mahallesi’nde vâki‘ Eğercibaşı Mehmed Ağa Vakfı’nın mütevellîsi bâ‘isü’l-vesîka es-Seyyid Abdullah b. Ömer nâm kimesne meclis-i şer‘-i hatîr-i lâzımü’t-tevkīrde bi’t-tevliye takrîr-i kelâm ve ta‘bîr ani’l-merâm edip bundan akdem keşf ve rü’yet olunup yedime i‘tâ olunan izin i‘lâmı nâtık olduğu üzere vakf-ı mezkûra rücû‘ şartıyla bi’l-izni’ş-şer‘î ta‘mîr ve tecdîd eylediğim su çeşmesi tekrar keşf ve mikdâr-ı masrûfum tahmîn ve misâha olunmak bi’t-tevliye matlûbumdur dedikde, savb-ı şer‘-i enverden irsâl olunan keşf nâibimiz müderrisîn-i kirâmdan mevlânâ es-Seyyid Mehmed Efendi ve Hâssa mi‘mârlarından Abdullah ve İbrahim halîfeler ve sâir ebniye ahvâline muttali‘ bî-garaz Müslimînden olup zeyl-i vesîkada muharrerü’l-esâmî kimesneler ile çeşme-i mezkûrun olduğu mahalle varup akd eylediği meclis-i şer‘-i münîrde mütevellî-i mezbûrun ta‘mîr ve tecdîd eylediği çeşmeyi misâha ve tahmîn ve takvîm eylediklerinde, tahrîr olunan mümzâ ve mahtûm Mi‘mâr Ağa defteri mantûku üzere çeşme-i mezkûrenin üzerine mevzû‘ pehlû döşeme ve kafa tahtası tûlen ve arzen bi-hisâb-ı terbî‘î yirmi yedi buçuk zirâ‘ beher zirâ‘ı altışar yüz akçeden on altı bin beş yüz akçe ve çeşme-i mezbûrun iki cânibe müceddeden binâ olunan bendli ve zevâneli terbî‘an yirmi bir zirâ‘ som dîvâr beher zirâ‘ı altışar yüz altışar akçeden on üç bin sekiz yüz altmış akçe ve beheri yedişer vakıyye olup her vakıyyesi altmışar akçeden üç aded demir bağlama bin iki yüz altmış akçe ve çeşme üzerine binâ olunan tûlen ve arzen saçak ma‘a elvan boya ve on buçuk zirâ‘ beher zirâ‘ı üçer yüz altmışar akçeden dört bin sekiz yüz altmış akçe ve çeşme-i mezbûrenin su hazînesi kapısına yirmi beş vakıyye demür kapak ve beher vakıyyesi altmışar akçeden bin beş yüz akçe ve çeşme-i mezbûrenin köşesinde binâ olunan on buçuk zirâ‘ som ayak beher zirâ‘ı dokuz yüz akçeden üç bin yüz elli akçe ve saçak-ı mezkûrun tahtında iki aded topaç eğrisi ma‘an boya ikişer yüz kırkar akçeden dört yüz seksen akçe ve çeşme-i mezkûrenin köşesinde vaz‘ olunan varul taşı üç yüz akçe ve çeşme-i mezbûre üzerine kitâbeli müzehheb mermer târih taşı bin iki yüz akçe [ve] hammâliye ve hedmiye ve mesârıf-ı sâire dört bin üç yüz akçe [ki] cem‘an kırk yedi bin dört yüz on akçe olmağın, bi-hisâb-ı guruş üç yüz doksan beş guruş on akçe ile ancak tecdîd ve ta‘mîr olunur noksan ile mümkün değildür deyü hulefâ-i mezkûrûn ve Müslimûn icmâ‘ ve ittifâk eylediklerini, mevlânâ-yı merkūm mahâllinde tahrîr ba‘dehû ma‘an ba‘s olunan ümenâ’-i şer‘le meclis-i şer‘a gelüp alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 26 Rebî‘ülâhir sene [1]194. [41b] Şuhûdü’l-hâl: Müderrisîn-i kirâmdan es-Seyyid İbrahim Efendi, el-Hâc Mustafa Ağa b. Mustafa, el-Hâc Mustafa Ağa b. el-Hâc Ömer, el-Hâc İsmail Ağa b. el-Hâc Salih, Ali Ağa [b.] Halil.