İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 173 Hüküm no: 142 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun bt. Ali’nin Küçük Karaman Çarşısı’ndaki berber dükkânını Benlizâde Ahmed Raşid Efendi b. Mustafa Ağa’ya üç yüz doksan guruşa sattığı Mübâya‘a-i dükkân-ı berber Mahmiye-i İstanbul’da Müneccim Sadi Mahallesi’nde sâkine ve zâtı Şeyh Resmî [Câmi‘-i şerîfi] imâmı Mustafa Şâkir Efendi b. Mustafa ve Ahmed Efendi b. Mehmed nâm kimseler ta‘rîfleriyle mu‘arrefe olan Fâtıma Hatun bt. Ali meclis-i şer‘-i şerîf-i enverde müderrisîn-i kirâm-ı zevi’l-ihtirâmdan işbu bâ‘isü’l-kitâb Benlizâde sa‘âdetlü Ahmed Râşid Efendi b. el-merhûm Mustafa Ağa mahzarlarında bi-tav‘ihâ ikrâr-ı tâm ve takrîr-i kelâm edip arsasının merhûm Şeyh Resmî Vakfı’na senevî yüz yirmi akçe mukāta‘ası olup ve üzerinde olan bi’l-cümle ebniyesi akd-i âti’z-zikrin sudûruna değin bi’l-irsi’ş-şer‘î yedimde mülk ve hakkım olan mahmiye-i mezbûrede cennet-mekân firdevs-âşiyân merhûm ve mağfûrun-leh Ebulfeth Sultân Mehmed Han ‒aleyhi’r-rahmetü ve’l-gufrân‒ hazretleri câmi‘-i şerîfi civârında Karaman-ı sagīr sükunda vâki‘ bir tarafdan Na‘lçacı el-Hâc İbrahim dükkânı ve bir tarafdan Fâtıma Hatun tasarrufunda olan attar dükkânı ve bir tarafdan sâbıkā [Medîne-i] münevvere Kadısı fazîletlü Mehmed Mekkî Efendi hazretleri tasarruflarında olan vakıf arsa ve taraf-ı râbi‘i tarîk-i âm ile mahdûd iki kepenk bir bâb berber dükkânımı bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mûmâ-ileyh Ahmed Râşid Efendi’ye üç yüz doksan guruşa bey‘ ve temlîk ve teslîm eylediğimde, onlar dahi ber-vech-i muharrer iştirâ ve temellük ve tesellüm ve kabz ve kabûl edip semeni olan meblağ-ı mezbûr üç yüz doksan guruşu müşteri-i mûmâ-ileyh yedlerinden bi’t-tamam ve’l-kemâl ahz ü kabz eyledim. Fîmâ-ba‘d dükkân-ı mahdûd-ı mezkûr mûmâ-ileyh Ahmed Râşid Efendi’nin mülk-i müşterâsı olup benim kat‘â alâka ve medhalim kalmamağla, bey‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini ibrâ-i âm ile ibrâ ve ıskāt ve her birimiz âharın ibrâsını kabûl eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurre-i Cumâdelûlâ sene [1]194. Şuhûdü’l-hâl: Kâtib Ahmed Efendi b. Halil, Molla Mehmed b. Ahmed, diğer Molla Mehmed b. Mustafa, Muhzır Mehmed Emin Ağa b. el-Hâc Mustafa, Muhzır Molla Süleyman b. Osman.