İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 174 Hüküm no: 143 Orijinal metin no: [41b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerîfe Sâliha bt. İbrahim’in Hızır Bey Mahallesi’ndeki menzilin bir hissesini kocası Mehmed b. Ebubekir’e beş yüz guruşa sattığı Mübâya‘a-i menzil-i hisse Mahmiye-i İstanbul’da Zeyrek kurbünde Hızır Bey Mahallesi sâkinelerinden Şerîfe Sâliha bt. es-Seyyid İbrahim nâm hatun tarafından husûs-ı âti’z-zikrde vekîl olduğu zâtını ârifân olan Yorganî el-Hâc Mehmed b. Hasan ve el-Hâc Mehmed b. Hüseyin nâm kimesneler şehâdetleriyle sâbit olan İsmail Çelebi b. Hüseyin nâm kimesne meclis-i şer‘-i hatîr-i lâzımü’t-tevkīrde müvekkile-i mezbûrenin zevci işbu bâ‘isü’l-kitâb es-Seyyid Mehmed b. es-Seyyid Ebûbekir nâm kimesne mahzarında bi’l-vekâle ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedinde mülk ve hakkı olup mahalle-i mezbûrede vâki‘ sekiz sehim i‘tibâriyle bir tarafdan Şemsi Paşa Vakfı’ndan arsa ve bir tarafdan Baltacı Hâfız Mehmed Efendi Bağçesi ve ba‘zan Abdi Ağa Bağçesi ve bir tarafdan Şerîfe Hadîce Hatun’a ifrâz olunan menzil ve bir tarafdan tarîk-i âm ile mahdûd hisse-i müfrezesini keşf i‘lâmında tahrîr olunduğu vech üzere hudûd ve müştemilâtı muhtevî dört sehim hisse-i şâyi‘asının bir sehmini tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile zevci mezbûr es-Seyyid Mehmed’e beş yüz guruşa bey‘ ve temlîk ve teslîm eylediğinde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr beş yüz guruşu zevci mezbûr es-Seyyid Mehmed yedinden bi’t-tamam ve’l-kemâl ahz ü kabz edip fîmâ-ba‘d müvekkilem mezbûre Şerîfe Sâliha Hatun’un zikrolunan bir sehim hisse-i şâyi‘ada asla ve kat‘â alâka ve medhali kalmayup zevci mezbûr es-Seyyid Mehmed’in mülk-i müşterâsı ve hakk-ı sırfı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 Ca sene [1]194. Şuhûdü’l-hâl: Kalaycı Halil Beşe b. Mahmud, es-Seyyid Mehmed Ağa b. Abdullah, İsmail Çelebi b. Ali, Kürkçü es-Seyyid Hasan, Mehmed Emin Efendi.