İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 174 Hüküm no: 144 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerîfe Sâliha bt. İbrahim’in Hızır Bey Mahallesi’ndeki menzilin iki hissesini kızı Şerîfe Ayşe’ye bin guruşa sattığı Mübâya‘a-i hisse-i menzil Mahmiye-i İstanbul’da Zeyrek kurbünde Hızır Bey Mahallesi sâkinelerinden Şerîfe Sâliha bt. es-Seyyid İbrahim nâm hatun tarafından husûs-ı âti’z-zikrde vekîl olduğu zâtını ârifân Yorganî el-Hâc Mehmed b. Hasan ve el-Hâc Mehmed b. Hüseyin nâm kimesneler şehâdetleriyle sâbit olan İsmail Çelebi b. Hüseyin nâm kimesne meclis-i şer‘-i hatîr-i lâzımü’t-tevkīrde sadriye kebîre kızı bâ‘isetü’l-kitâb Şerîfe Âişe Hatun’un zevci ve tarafından tasdîka vekîl-i müseccel-i şer‘îsi es-Seyyid el-Hâc Hüseyin mahzarında bi’l-vekâle ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedinde mülk ve hakkı olup mahalle-i mezbûrede vâki‘ sekiz sehim i‘tibâriyle bir tarafdan Şemsi Paşa Vakfı’ndan arsa ve bir tarafdan Baltacı Hâfız Mehmed Efendi Bağçesi ve ba‘zan Abdi Ağa Bağçesi ve bir tarafdan Şerîfe Hadîce Hatun’a ifrâz olunan menzil ve bir tarafdan tarîk-i âm ile mahdûd hisse-i müfrezesini keşf i‘lâmında tahrîr olunduğu vech üzere hudûd ve müştemilâtı muhtevî dört sehim hisse-i şâyi‘asının iki sehmini tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile kızı müvekkile-i mezbûre Şerîfe Âişe Hatun’a bin guruşa bey‘ ü temlîk ve teslîm eylediğinde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr bin guruşu mezbûre Şerîfe Âişe Hatun yedinden bi’t-tamam ve’l-kemâl ahz ü kabz edip fîmâ-ba‘d müvekkilem mezbûre Şerîfe Âişe Hatun’un mülk-i müşterâsı ve hakk-ı sırfı olmuşdur, keyfe mâ teşâ’ ve tahtâr mutasarrıf[e] olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 min-Cumâdelûlâ sene [1]194. Şuhûdü’l-hâl: eş-Şâhidûne’s-sâbıkūn.