İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 175 Hüküm no: 145 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Donik v. Toros’un Beşiktaş Dolmabahçe’deki çörekçi fırını gediğini Çörekçi İsmail b. Mahmud’a yüz elli guruşa sattığı Mübâya‘a-i fırın-ı çörekçi Mahrûse-i Galata’ya muzâfe Beşiktaş nâhiyesine tâbi‘ Dolmabahçe’de vâki‘ fırında habbâz olan Donik v. Toros nâm zimmî meclis-i şer‘-i hatîr-i lâzımü’t-tevkīrde çörekçi tâifesinden bâ‘isü’l-kitâb el-Hâc İsmail b. Mahmud nâm kimesne mahzarında ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimde mülk ve hakkım olup zikrolunan Dolmabahçe’de vâki‘ mukeddemâ çörekçi fırını olup bir müddet kapalu ve mu‘attal kaldıkdan-sonra bir müddet fırın-ı mezkûrda nân-ı azîz tabh ve i‘mâl olunmuşidi. Lâkin fırın-ı mezkûr çörekçi fırını olmağla derûnunda mevcûde olan âlât-ı lâzıme-i ma‘lûmeyi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr el-Hâc İsmail’e yüz elli guruşa bey‘ ü temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezbûr yüz elli guruşu mezbûr el-Hâc İsmail yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mezbûr el-Hâc İsmail’in zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru ba‘de’l-kabûl zikrolunan âlât-ı lâzıme-i ma‘lûmede benim asla ve kat‘â alâka ve medhalim kalmayup müşteri-i mezbûr el-Hâc İsmail’in mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb ve imlâ olundu. Fî 9 min-Cumâdelûlâ sene [1]194. Şuhûdü’l-hâl: Uncular Kethudâsı Mustafa Ağa, Uncular yiğitbaşısı el-Hâc Abdullah, el-Hâc Ahmed Ağa, Habbâzân Yiğitbaşısı es-Seyyid Mehmed Emin Ağa, Çörekçi Kethudâsı es-Seyyid el-Hâc Ahmed, Çörekçiler Yiğitbaşısı Halil, Kadı-oğlu Hâfız Mustafa Efendi, Usta Mikail, Usta Vartan, Usta Filibos, Usta Serkiz, [Usta] Bağdasar, [Usta] Bedros.