İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 177 Hüküm no: 147 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Ahmed Çelebi b. İbrahim ile Tüccar Nuh Çelebi b. Ahmed’in hesaplaşıp birbirlerinin zimmetini ibra ettikleri Mahmiye-i İstanbul sükkânından ve tüccâr tâifesinden Ahmed Çelebi b. İbrahim nâm kimesne meclis-i şer‘-i hatîr-i lâzımü’t-tevkīrde yine tüccârdan işbu bâ‘isü’l-kitâb es-Seyyid Nuh Çelebi b. Ahmed nâm kimesne mahzarında ikrâr-ı tâm ve takrîr-i kelâm edip mezbûr es-Seyyid Nuh ile bundan akdem beynimizde bir müddet mu‘âmelât cereyân edip pazarbaşı ve ihtiyâr ustalar ma‘rifetleriyle hesâbımızı hesâb-ı sahîh ile [43a] rü’yet eylediğimizde, benim mezbûr es-Seyyid Nuh Çelebi zimmetinde zuhûr eden ma‘lûmü’l-mikdâr hakkımı mezbûr es-Seyyid Nuh Çelebi bana def‘ ü teslîm, ben-dahi yedinden bi’t-tamam ve’l-kemâl ahz ü kabz edip fîmâ-ba‘d husûs-ı mezkûra ve işbu târih-i kitâba gelince sâir beynimizde cereyân eden ahz ü i‘tâ ve mu‘amelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve kâffe-i eymân ve muhâsamâtdan ben mezbûr es-Seyyid Nuh Çelebi’nin zimmetini ibrâ-i âmm-ı kātı‘ü’n-nizâ‘la ibrâ ve ıskāt-ı tâmm-ı râfi‘ü’l-hısâm ile ibrâ ve ıskāt, ol dahi husûs-ı mezkûra ve sâir beynimizde cereyân eden ahz ü i‘tâ ve mu‘amelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve kâffe-i eymân ve muhâsamâtdan kezâlik benim zimmetimi ibrâ-i âm ile ibrâ ve ıskāt edip ve her birimiz âharın ber-vech-i muharrer ibrâsını kabûl eyledik dediğini mezbûr es-Seyyid Nuh Çelebi tasdîk etmeğin mâ-vaka‘a bi’t-taleb ketb olundu. Fî 15 min-Cumâdelûlâ sene [1]194. Şuhûdü’l-hâl: el-Hâc İbrahim Ağa, el-Hâc Hüseyin Ağa, Yamak Hacı Mehmed, el-Hâc Hasan Ağa, es-Seyyid el-Hâc Mehmed Emin.