İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 178 Hüküm no: 148 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Esad b. Pehlivanzâde Mehmed Ağa’nın Dülgeroğlu Mahallesi’ndeki menzil ve müştemilâtını Hafız Ömer Efendi b. Osman’a bin yüz elli guruşa sattığı Husûs-ı âti’l-beyânın mahâllinde ketb ü tahrîri iltimâs olunmağla cânib-i şer‘-i kavîmden vekāyi‘ kâtibimiz mevlânâ Şeyh-zâde Mehmed Emin Efendi irsâl olunup, ol dahi mahmiye-i İstanbul’da Şehzâde Câmi‘-i şerîfi kurbünde Kalenderhâne Mahallesi’nde vâki‘ Hâfız İbrahim Ağa nâm kimesnenin menziline varup huzûr-ı Müslimînde akd-i meclis-i şer‘-i âlî eyledikde, mahmiye-i mezbûrede Ali Paşa-yı atîk Mahallesi sükkânından Mehmed Esad b. Pehlivanzâde Mehmed Ağa nâm kimesne meclis-i ma‘kūd-ı mezkûrda işbu bâ‘isü’l-kitâb izzetlü Hâfız Ömer Efendi b. Osman nâm kimesne mahzarında ikrâr-ı tâm ve takrîr-i kelâm edip işbu akd-i âti’z-zikrin sudûruna değin bâ-hüccet-i şer‘iyye yedimde mülk ve hakkım olup İstanbul’da Dülgeroğlu Mahallesi’nde vâki‘ bir tarafdan Abdullah Efendi menzili ve bir tarafdan ba‘zan Abdurrahman Efendi menzili ve bir tarafdan menzil-i merkūmdan müfrez menzil ve bir tarafdan Yorganî ( ) Çelebi menzili ve bir tarafdan tarîk-i âm ile mahdûd tabaka-i ulyâda iki bâb oda ve bir kahve odası ve kenîf ve dehliz ve tabaka-i vüstâda iki bâb oda ve kahve odası ve kenîf ve âbdesthâne ve dehliz ve süflâda bir matbah ve bir kârgir hamam ve bi’r-i mâ’ ve kömürlük ve zîr-i zemîn mahzen ve bir mikdâr havluyu müştemil mülk menzilimi, bi-cümletin mâ-yeştemiluhû ve yahvîhi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mûmâ-ileyh Hâfız Ömer Efendi’ye bin yüz elli guruşa bey‘ ü temlîk ve teslîm eylediğimde, ol dahi dahi ber-vech-i muharrer iştirâ ve temellük ve tesellüm ve kabz ü kabûl edip semeni olan meblağ-ı mezkûr bin yüz elli guruşu işbu meclis-i şer‘de bana tamamen def‘ ü teslîm, ben-dahi yedinden bi’t-tamam ve’l-kemâl ahz ü kabz ve istifâ edip bey‘-i mezkûrun tağrîr ve gabnine müte‘allika âmme-i de‘âvî ve kâffe-i mutâlebâtdan mûmâ-ileyh Hâfız Ömer Efendi’nin zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru ba‘de’l-kabûl fîmâ-ba‘d menzil-i mahdûd-ı mezkûrda benim asla ve kat‘â alâka ve medhalim kalmayup mûmâ-ileyh Hâfız Ömer Efendi’nin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı merkūm mahâllinde ketb ü tahrîr ve ma‘an meb‘ûs ümenâ’-i şer‘le meclis-i şer‘a gelüp alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 22 min-Ca sene [1]194. Şuhûdü’l-hâl: Mehmed Emin Efendi hazretleri, es-Seyyid Mehmed b. Mustafa, Mehmed Emin Efendi b. Yusuf, Feyzullah b. Halil, Mehmed b. Musa.