İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 179 Hüküm no: 149 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hatun bt. Çörekçi Hüseyin’in Avratpazarı’ndaki çörekçi dükkânı gediğini İbrahim Usta b. Ömer’e beş yüz guruşa sattığı Çörekçi Zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Emetullah Hatun bt. Çörekçi el-Hâc Hüseyin meclis-i şer‘-i şerîf-i enverde işbu bâ‘isü’l-kitâb İbrahim Usta b. Ömer nâm kimesne mahzarında ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimde mülk ve hakkım olup İstanbul’da Avratpazarı nâm mahâlde vâki‘ bir bâb çörekçi dükkânı derûnunda mevcûde beyne’l-hiref gedik ta‘bîr olunur on dokuz sagīr ve kabîr tâbe ve iki pirinç tas ve iki kazgan biri pirinç ve biri bakır, ve iki terâzi ma‘a derâhim ve altı bakır tebsi ve altı bıçak ve iki satır ve bir karavana ve üç kantar ve bir akçe tahtası ve bir balta ve bir kürek ve on bir çörek tahtası ve bir <> kıyma tahtası ve bir kandil ve bir kanca ve bir honi ve bir demir tâbe [43b] ve beş tabla ve bir çamçak ve bir tekne ve bir fıçı ve bir kasnâk ve taş havan ve bir çekmece ve bir kum sâ‘ati ve bir kebîr tekne ve bir sepet ve sâir çörekçi âlât-ı lâzımemi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile beş yüz guruşa mezbûr İbrahim Usta’ya bey‘ ve temlîk ve teslîm eylediğimde, ol dahi ber-minvâl-i muharrer iştirâ ve temellük ve tesellüm ve kabz ve kabûl ettikden sonra semeni olan meblağ-ı mezkûr beş yüz guruşu mezbûr İbrahim Usta bana tamamen def‘ ü teslîm, ben-dahi yedinden tamamen ve kâmilen ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mezbûr İbrahim Usta’nın zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru ba‘de’l-kabûl zikrolunan eşyâ ve âlât-ı lâzımede benim asla ve kat‘â alâkam kalmayup mezbûr İbrahim Usta’nın mülk-i müşterâsı ve hakk-ı sırfı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 min-Ca sene [1]194. Şuhûdü’l-hâl: Çörekçiler Kethudâsı Osman Usta, Yiğitbaşıları Halil Usta, Yazıcı Molla Süleyman, Ahmed b. Ömer, Halil Usta.