İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 180 Hüküm no: 150 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun bt. Şeyhülislâm-ı esbak Ali Efendi Vakfı’na ait Kalenderhane Mahallesi’ndeki arsa ile Hafız Ömer Efendi b. Osman’a ait Dülgeroğlu Mahallesi’ndeki mülk menzil ve müştemilatının keşfi ve istibdâline izin verildiği Ahbartü bimâ-fîhi Dürrîzâde es-Seyyid Mehmed Ârif el-Kādî bi-Dârü’l-hilâfeti’l-aliyyeti’s-seniyye Harrerehü’l-fakīr ileyhi azze şânühu Elhamdülillâhi Rabbi’l-âlemîn ve’s-salâtü ve’s-selâmü alâ-Nebiyyihî Muhammedin ve âlihî ve sahbihî ecma‘în ammâ-ba‘d işbu kitâb-ı sıhhat-nisâbın tahrîr ü inşâsına bâ‘is ve tastîr ü imlâsına bâdî oldur ki zikri âtî husûsun mahâllinde ketb ü tahrîrleri içün kıbel-i şer‘den me’zûnen bi’l-hükm vekāyi‘ kâtibimiz Şeyh-zâde Mehmed Emin Efendi irsâl olunup, ol dahi hâssa mi‘mârânından Hâfız İbrahim b. Halil ve Hasan b. Hüseyin halîfeler ile mahmiye-i İstanbul’da Kalenderhâne Mahallesi’nde vâki‘ zikri câ’î vakıf arsa ile civârında olan Dülgeroğlu Mahallesi’nde vâki‘ mülk menzile varup zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî eyledikde, İstanbul’da Topkapı dâhilinde Kürkçübaşı Câmi‘-i şerîfi’nde yevmî beş akçe vazîfe ile vaz‘ eylediği şeyhü’l-kurrâya yevmî bir akçe icâre vermek üzere tevliyet ve süknâsı zikrolunan Kalenderhâne Câmi‘-i şerîfi’nde imâm-ı evvel olanlara meşrûta merhûme Fâtıma Hatun bt. el-müteveffâ Şeyhülislâm-ı esbak Ali Efendi nâm sahibetü’l-hayr vakfından muhterik olup su hazînesi ve inhidâma mâil fevkānî hamamı müştemil menzil arsasının ber-vech-i meşrûta mütevellîsi Hâfız Mehmed Emin Efendi b. İsmail Efendi meclis-i ma‘kūd-ı mezkûrda sâlifü’z-zikr Dülgeroğlu Mahallesi’nde vâki‘ bir bâb mülk menzilin mutasarrıfı Hâfız Ömer Efendi b. Osman nâm kimesne mahzarında ikrâr-ı sahîh-i şer‘î ve i‘tirâf-ı sarîh-i mer‘î edip vakf-ı mezbûrdan sâlifü’z-zikr Kalenderhâne Mahallesi’nde vâki‘ iki tarafdan Ser-çavuşân-ı dergâh-ı âlî sa‘âdetlü mekremetlü Ahmed Nazif Efendi hazretlerinin sa‘âdethâneleri ve bir tarafdan Mısırlı el-Hâc Abdullah zevcesi menzili ve bir tarafdan tarîk-i âm ile mahdûd arsa-i mezkûre ve mârrü’z-zikr Dülgeroğlu Mahallesi’nde bir tarafdan Abdullah Efendi menzili ve bir tarafdan ba‘zan Hâfız Abdurrahman Efendi menzili ve bir tarafdan menzil-i mezkûrdan müfrez menzil ve bir tarafdan Yorganî es-Seyyid ( ) Çelebi menzili ve bir tarafdan tarîk-i âm ile mahdûd ulyâda iki bâb oda ve bir kahve odası ve kenîf ve dehliz ve tabaka-i vüstâda iki bâb oda ve kahve odası ve kenîf ve âbdesthâne ve dehliz ve süflâda bir matbah ve bir hamam ve bi’r-i mâ’ ve kömürlük ve zîr-i zemîn mahzen ve bir mikdâr havluyu müştemil mülk menzil her vechile şeref ve rey‘ ve rağbet ve kıymet cihetinden ekser ve evfer olduğundan merkūm Hâfız Ömer Efendi mülk menzil-i mezkûru vakf olan arsa-i merkūme ile istibdâle tâlib ve bu takdîrce cânib-i vakfa nef‘-i kesîr olacağından [44a] ben-dahi istibdâle râzı ve râgıb olmamla, hâlâ yedimde olup meclis-i şer‘de mu‘âyene ve müşâhede olunan istibdâle izn-i sultânîyi hâvî emr-i şerîf-i âlî-şân mûcebince izin taleb ederim deyü ibrâz eylediği emr-i âlî-şâna imtisâlen mevlânâ-yı merkūm dahi mi‘mârân-ı merkūmân ile vakıf olan arsayı misâha eylediklerinde, mi‘mârân-ı mezbûrân misâhalarıyla tûlen ve arzen bi-hisâb-ı terbî‘î dört yüz iki zirâ‘ ve zukāk içinde olmağla kıymeti beş yüz elli beş guruş ve mülk olan menzil terbî‘an yüz yetmiş bir zirâ‘ arsa üzerinde yüz altmış yedi buçuk zirâ‘ binâyı muhtevî olup lâkin kıymeti bin yedi yüz yetmiş iki buçuk guruş olduğu tahmîn-i ehl-i vukūf ile zâhir ve mukarrer olmağla, istibdâli min-külli’l-vücûh cânib-i vakfa enfa‘ ve hayr-ı mahz olduğunu mi‘mârân ve sâir ehl-i vukūf alâ-tarîkı’ş-şehâde haber verdiklerinde, mütevellî-i merkūm Hâfız Mehmed Emin Efendi binâen-aleyh arsa-i mevkūfe-i mezkûreyi mülk olan menzil-i merkūm ile istibdâl ve arsa-i mevkūfe-i mezkûreyi mülk olmak üzere mezbûr Hâfız Ömer Efendi’ye teslîm, ol dahi ba‘de’t-tesellüm mülk menzili vakf olmak üzere bana teslîm, ben dahi ahz ve tesellüm eyledim dedikde gıbbe’t-tasdîkı’ş-şer‘î merkūm Hâfız Ömer Efendi istibdâl-i mezkûrun adem-i cevâzına zâhib olan eimme-i kirâm hazerâtının kavl-i şerîfleri üzere istibdâl-i mezkûrdan rücû‘ ve menzil-i mezkûru ke’l-evvel mülküm olmak üzere istirdâd ederim dedikde, mütevellî-i merkūm Hâfız Mehmed Emin Efendi dahi istibdâl-i mezkûrun sıhhat ve cevâzına zâhib olan fukahâ-i izâm ve meşâyih-i kirâm hazerâtının re’y-i şerîfleri üzere teslîmden imtinâ‘ ile mevlânâ-yı merkūm huzûrunda kemâ-hüve’l-mastûr fi’l-kütübi’l-fıkhiye müterâfi‘ân ve her biri fasl ü hasma tâlibân olduklarında, mevlânâ-yı merkūm dahi istibdâl-i mezkûrun sıhhat ve cevâzına ve ba‘dehû lüzûmuna zâhib olan meşâyih-i kirâm hazerâtının re’y-i şerîfleri üzere hükm-i sahîh-i şer‘î ve kazâ-i sarîh-i mer‘î eyleyüp, mülk olan menzili arsa-i mevkūfe bedeli, vakıf olan arsayı mülk olan menzil bedeli mülk olduğunu mahâllinde ba‘de’l-hükm ve’t-tahrîr ma‘an meb‘ûs ümenâ-i şer‘le meclis-i şer‘a gelüp alâ-vukū‘ihî inhâ ve takrîr etmeğin ba‘de’t-tenfîz mâ-vaka‘a bi’t-taleb ketb olundu. Hurrire fî 27 min-Cumâdelûlâ [li-]sene [1]194. Şuhûdü’l-hâl: Feyzullah b. Halil, el-Hâc Mehmed Ağa, es-Seyyid Mehmed b. Mustafa, Mehmed Ağa b. Ahmed, Mehmed Emin Efendi b. Yusuf, Manav Mustafa b. Hasan, Mehmed Emin Efendi, es-Seyyid Mehmed Sâdık Efendi.