İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 182 Hüküm no: 151 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Ömer Efendi b. Osman’ın Kalenderhane Mahallesi’ndeki arsasını Çavuşbaşı Ahmed Nazif Efendi’ye beş yüz elli guruşa sattığı Mahmiye-i İstanbul’da Şehzâde Câmi‘-i şerîfi kurbünde Kalenderhâne Mahallesi sükkânından Hâfız Ömer Efendi b. Osman nâm kimesne meclis-i şer‘-i Nebevî ve dîn-i münîf-i Mustafa[vî]’de çavuşbaşı olan bâ‘isü’l-kitâbi’l-müstetâb sa‘âdetlü semâhatlü mekremetlü Ahmed Nazif Efendi hazretleri taraf-ı şerîflerinden husûs-ı âti’z-zikri tasdîka vekîl-i şer‘îleri kîsedârları izzetlü Ömer Efendi b. Mustafa Ağa mahzarında ikrâr-ı tâm ve takrîr-i kelâm edip işbu akd-i âti’z-zikrin sudûruna değin istibdâl tarîkıyle bâ-fermân-ı âlî ve bâ-hüccet-i şer‘iyye mülkiyetine hükm-i şer‘î lâhık olup bu vechile yedimde mülküm olan mahalle-i mezbûrede vâki‘ bir tarafdan Mısırlı el-Hâc Abdullah zevcesi menzili ve iki tarafdan müşârün-ileyh Ahmed Nazif Efendi hazretleri menzili ve bir tarafdan tarîk-i âm ile mahdûd muhterik bir su hazînesi ve inhidâma mâil fevkānî bir hamamı müştemil terbî‘an dört yüz iki zirâ‘ mülk arsamı, tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ile müşârün-ileyh Ahmed Nazif Efendi hazretlerine beş yüz elli beş guruşa bey‘ ve temlîk ve teslîm eylediğimde, onlar dahi ber-vech-i muharrer iştirâ ve temellük ve tesellüm ve kabz ü kabûl buyurmalarıyla, semeni olan meblağ-ı mezkûr beş yüz elli beş guruşu müşârün-ileyh hazretleri yedlerinden bi’t-tamam ve’l-kemâl ahz ü kabz edip fîmâ-ba‘d arsa-i mahdûd-ı mezkûrede benim asla ve kat‘â alâka ve medhalim kalmayup müşârün-ileyh Ahmed Nazif Efendi hazretlerinin mülk-i müşterâları ve hakk-ı sırfları olmuşdur, keyfe mâ yeşâ’ ve hasbe-mâ-yahtâr tasarruf buyursunlar dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 29 min-Cumâdelûlâ sene [1]194. Şuhûdü’l-hâl: eş-Şâhidûne’s-sâbıkūn.