İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 182 Hüküm no: 152 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Döğmeci Halil Beşe b. Ali ile eski ortağı Ali Usta b. Halil’in hesaplaşıp birbirlerinin zimmetini ibra ettikleri Mahmiye-i İstanbul’da Sultân Bâyezid-i Velî Câmi‘-i şerîfi havlusunda [buğday] döğmeci olan Halil Beşe b. Ali nâm kimesne meclis-i şer‘-i hatîr-i lâzımü’t-tevkīrde şerîki işbu bâ‘isü’l-kitâb Ali Usta b. Halil nâm kimesne mahzarında ikrâr-ı tâm ve takrîr-i kelâm edip mezbûr Ali Usta ile döğmecilik ticâretinde ınâ[nen] şerîk olup bir müddet beynimizde mu‘âmelât cereyânından sonra mezbûr Ali Usta ile ustalar muvâcehelerinde hesâb-ı sahîh ile hesâbımızı rü’yet eylediğimizde, mezbûr Ali Usta zimmetinde zuhûr eden bin iki yüz yetmiş beş guruş hakkımı mezbûr Ali Usta bana tamamen def‘ ü teslîm, ben-dahi yedinden bi’t-tamam ve’l-kemâl ahz ü kabz edip ba‘de’l-yevm husûs-ı şirkete ve fâide da‘vâsına ve seksen altı Muharremi’l-harâmı gurresinden işbu târih-i kitâba gelince sâir beynimizde cereyân eden cemî‘ mu‘âmelâta müte‘allika âmme-i de‘âvî ve mutâlebât ve kâffe-i eymân ve muhâsamâtdan ben mezbûr Ali Usta’nın zimmetini ibrâ-i âmm-ı kātı‘ü’n-nizâ‘ ve ıskāt-ı tâmm-ı râfi‘ü’l-hısâm ile ibrâ ve ıskāt, ol dahi zikrolunan seksen altı senesi Muharremi’l-harâmı gurresinden işbu târih-i kitâba gelince beynimizde cereyân eden bi’l-cümle hukūk-ı ma‘lûme ve mechûleye müte‘allika âmme-i de‘âvî ve mutâlebât ve kâffe-i eymân ve muhâsemâtdan kezâlik benim zimmetimi ibrâ-i âm ile ibrâ ve ıskāt ve her birimiz âharın ber-vech-i muharrer ibrâsını kabûl eyledik dediğini mezbûr Ali Usta tasdîk etmeğin mâ-vaka‘a bi’t-taleb ketb olundu. Fî 5 C sene [1]194. Şuhûdü’l-hâl: Molla Ahmed b. İsmail, Mehmed Emin Kethudâ b. Mustafa, İbrahim b. Ahmed, Mehmed b. el-Hâc İsmail, Ahmed b. Mustafa.