İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 183 Hüküm no: 153 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Petro v. Yoyo ile Miho v. Minyo’nun Mehmed Ağa Camii yakınındaki ekmekçi fırını ve değirmenin iki ve iki üçte bir hisselerini Cafer Usta b. Ali ile İlyas Usta b. Ahmed’e beş yüz guruşa sattıkları Habbâz tâifesinden Petro v. Yoyo nâm zimmî meclis-i şer‘-i hatîr-i lâzımü’t-tevkīrde işbu bâ‘isü’l-kitâb Cafer Usta b. Ali ve İlyas Usta b. Ahmed nâm kimesneler mahzarlarında ikrâr-ı tâm ve takrîr-i kelâm edip İstanbul’da Mehmed Ağa Câmi‘-i şerîfi kurbünde Mehmed Ağa fırını demekle ma‘rûf bir bâb ekmekçi fırını [ve] ittisâlinde kâin yirmi sehim i‘tibâr olunur beş horoslu bir bâb ekmekçi değirmeni derûnunda mevcûde beyne’l-hiref gedik ta‘bîr olunur yirmi re’s bargirden mutasarrıf olduğum altı re’s ve iki sülüs re’s bargirden beş re’sini ben ve kezâlik altı re’s ve iki sülüs bargire mutasarrıf olan işbu hazır bi’l-meclis Miho v. Minyo zimmî dahi beş re’sini yedimizde ibkā ve birer bargir ve ikişer sülüs bargirimizi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûrân Cafer ve İlyas ustalara ikişer yüz ellişer guruşa ale’l-iştirâki’s-seviy bey‘ ve temlîk ve teslîm eylediğimizde, onlar dahi ber-vech-i muharrer iştirâ ve temellük ve tesellüm ve kabz ü kabûl ettiklerinden sonra semenleri olan meblağ-ı mezkûr ikişer yüz ellişer guruşu her birimiz mezbûrân Cafer Usta ve İlyas ustalar yedlerinden bi’t-tamam ve’l-kemâl ahz ve kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mezbûrân Cafer ve İlyas ustalardan her birinin zimmetlerini ibrâ-i âm ile ibrâ ve ıskāt edip fîmâ-ba‘d zikrolunan birer re’s ve ikişer sülüs bargir ve sâir âlât-ı ma‘lûmede bizim asla ve kat‘â alâka ve medhalimiz [45a] kalmayup mezbûrân Cafer ve İlyas ustaların mülk-i müşterâları ve hakk-ı sırfları olmuşdur, keyfe mâ yeşâ’ân ve yahtârân mutasarrıfân olsunlar dediklerinde mezbûr Miho ve Cafer ve İlyas’dan her biri tasdîk etmeğin mâ-vaka‘a bi’t-taleb ketb olundu. Fî 3 min-Cumâdelâhire sene 1194. Şuhûdü’l-hâl: Habbâzân Kethudâsı İsmail Ağa, el-Hâc Ahmed Ağa, Hâfız Mustafa, Yiğitbaşı es-Seyyid Mehmed Emin Ağa, Çörekçi Molla Ahmed, Uncuları Kethudâsı Mustafa Ağa.