İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 184 Hüküm no: 154 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerîfe Râbia bt. Mehmed b. Abdullah’ın Mehmed Ağa Camii yakınındaki ekmekçi fırını ve değirmenin altı ve iki üçte bir hisselerini Cafer Usta b. Ali ile İlyas b. Ahmed’e bin guruşa sattığı İstanbul’da Edirne Kapısı dâhilinde Neslişah Sultân Mahallesi’nde sâkine Şerîfe Râbia bt. el-Hâc Mehmed b. Abdullah tarafından husûs-ı âti’z-zikri ikrâra vekîl olduğu zâtını ârifân olan Lüleci Ahmed Çelebi b. Mehmed ve Mehmed Emin Efendi b. Mustafa nâm kimesneler şehâdetleriyle sâbit olan müezzin-i mahalle-i mezkûre Molla Ali b. Ali nâm kimesne meclis-i şer‘-i hatîr-i lâzımü’t-tevkīrde habbâz tâifesinden işbu bâ‘isü’l-kitâb Cafer Usta b. Ali ve İlyas b. Ahmed nâm kimesneler mahzarlarında bi’l-vekâle ikrâr-ı tâm ve takrîr-i kelâm edip akd-i âti’z-zikrin sudûruna değin müvekkilem mezbûre Şerîfe Râbia’nın yedinde mülkü olup İstanbul’da Mehmed Ağa Câmi‘-i şerîfi karşusunda Mehmed Ağa fırını demekle ma‘rûf bir bâb ekmekçi fırını ve ittisâlinde kâin yirmi sehim i‘tibâr olunan beş horoslu bir bâb ekmekçi değirmeni derûnunda vâki‘ beyne’l-esnâf gedik ta‘bîr olunur yirmi re’s bargir ve yirmi re’s bargire isâbet eden sâir âlât-ı lâzıme-i ma‘lûmeden mutasarrıfe olduğu altı re’s ve iki sülüs re’s bargir ve ve sâir âlât-ı lâzıme-i ma‘lûmesini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûrân Cafer Usta ve İlyas ustalara ale’l-iştirâki’s-seviy bin guruşa bi’l-vekâle bey‘ ü temlîk ve teslîm eylediğinde, onlar dahi ber-vech-i muharrer iştirâ ve temellük ve tesellüm ve kabz ve kabûl ettikden sonra semeni olan meblağ-ı mezkûr bin guruşu mezbûrân Cafer ve İlyas ustalar yedlerinden bi’t-tamam ve’l-kemâl ahz ve kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan bi’l-vekâle mezbûrân Cafer ve İlyas ustaların zimmetlerini ibrâ-i âm ile ibrâ ve ıskāt eylediğimde, ol dahi ibrâ-i mezkûru ba‘de’l-kabûl zikrolunan altı re’s ve iki sülüs re’s bargir ve âlât-ı ma‘lûmede müvekkilem merkūme Şerîfe Râbia Hatun’un asla ve kat‘â alâka ve medhali kalmayup mezbûrân Cafer ve İlyas ustaların mülk-i müşterâları ve hakk-ı sırfları olmuşdur, keyfe mâ yeşâ’ ve hasbe-mâ-yahtâr mutasarrıfân olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 3 Cumâdelâhire sene [1]194. Şuhûdü’l-hâl: Şâhidûne’s-sâbıkūn.