İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 185 Hüküm no: 155 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi İbrahim ve Ahmed b. Mısırlı Mehmed kardeşlerin Yedikule selhhaneleri yakınındaki çörekçi dükkânı gediğinin nısfını Çörekçi Senkola v. Ogyan’a dokuz yüz otuz guruşa sattıkları Çörekçi Çörekçi tâifesinden İbrahim ve Ahmed ibney Mısırlı el-Hâc Mehmed meclis-i şer‘-i hatîr-i lâzımü’t-tevkīrde çörekçi tâifesinden bâ‘isü’s-sifr Senkola v. Ogyan nâm zimmî muvâcehesinde her bir ikrâr-ı tâm ve takrîr-i kelâm edip işbu akd-i âti’z-zikrin sudûruna değin ale’l-iştirâki’s-seviy yedimizde mülk ve hakkımız olup Yedikule hâricinde vâki‘ selhhâneler kurbünde kâin bir bâb çörekçi dükkânı derûnunda mevcûde beyne’l-hiref gedik ta‘bîr olunur âlât-ı lâzıme-i ma‘lûmede olan nısf hisse-i şâyi‘amızı tarafeynden îcâb ve kabûlü hâvî şûrût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûr Senkola zimmîye dokuz yüz otuz guruşa bey‘ ve temlîk ve teslîm eylediğimizde, ol dahi ber-vech-i muharrer iştirâ ve temellük ve tesellüm ve kabz ve kabûl ettikden sonra semeni olan meblağ-ı mezkûr dokuz yüz otuz guruşu mesfûr Senkola yedinden bi’t-tamam ve’l-kemâl ahz ve kabz edip fîmâ-ba‘d âlât-ı lâzıme-i mezkûrenin nısf hisse-i şâyi‘asında bizim asla ve kat‘â alâka ve medhalimiz kalmayup mesfûr Senkola zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 10 Cumâdelâhire sene [1]194. Şuhûdü’l-hâl: Kethudâ Osman Ağa b. Mahmud Bey, Yiğitbaşı Halil, Mehmed b. Mehmed, Süleyman Çelebi b. Abdullah, Halil Beşe b. Hüseyin.