İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 186 Hüküm no: 156 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Ahmed Efendi b. Hasan’ın terekesi vârisinin Mehmed Efendi b. Mehmed olduğu Vilâyet-i Anadolu’da medîne-i Adana’da Yortan Mahallesi sükkânından iken bundan akdem Medîne-i münevvere’de vefât eden el-Hâc Ahmed Efendi b. Hasan b. Abdullah’ın li-ebeveyn er karındaşı oğlu olup hasren vârisi olduğunu iddi‘â eden işbu bâ‘isü’l-kitâb Mehmed Efendi b. Mehmed meclis-i şer‘-i hatîr-i lâzımü’t-tevkīrde el-Hâc Ömer b. Ebûbekir nâm kimesne mahzarında üzerine da‘vâ ve takrîr-i kelâm edip müteveffâ-yı merkūm Ahmed Efendi ile babam mezbûr Mehmed li-ebeveyn er karındaşlar olup babaları ismi Hasan ve dedeleri ismi Abdullah ve vâlideleri ismi Zahide bt. Mehmed ve maskat-ı re’sleri mârrü’z-zikr Yortan Mahallesi olup ve ben müteveffâ-yı mezbûrun hasren vârisi ve terekesine müstahıkk-ı âharı olmamağla müteveffâ-yı mezbûrun merkūm el-Hâc Ömer zimmetinde cihet-i karz-ı şer‘îden beş guruş hakkı olup kable’l-ahz ve’l-istifâ fevt olmağla meblağ-ı mezbûr bi’l-irsi’ş-şer‘î bana isâbet ve intikāl etmekle, meblağ-ı mezkûr beş guruşu mezbûr el-Hâc Ömer’den bi’l-verâse hâlâ taleb ederim deyü da‘vâ ettikde mezbûr el-Hâc Ömer cihet-i mezkûreden müteveffâ-yı mezbûra beş guruş deyni[ni] ikrâr ve i‘tirâf ve ber-vech-i muharrer hasren vârisi olduğu ma‘lûmum değildir deyü inkâr ettikde, müdde‘î-i mezbûr Mehmed Efendi’den müdde‘âsına mutâbık beyyine taleb olundukda udûl-i ahrâr-ı ricâl-i Müslimînden ve mahalle-i mezbûre ahâlîsinden es-Seyyid Mehmed b. el-Hâc Bilal ve es-Seyyid Mahmud b. es-Seyyid Halil nâm kimesneler li-ecli’ş-şehâde meclis-i şer‘a hâzırân olup istişhâd olunduklarında, fi’l-hakīka müteveffâ-yı mezbûr el-Hâc Ahmed Efendi ile işbu müdde‘î-i merkūm Mehmed Efendi’nin babası müteveffâ Mehmed li-ebeveyn karındaşlar olup babaları ismi Hasan ve dedeleri ismi Abdullah ve anaları ismi Zahide bt. Mehmed ve maskat-ı re’sleri zikrolunan Yortan Mahallesi olup ve mezbûr Mehmed Efendi’den gayrı vârisi ve terekesine müstahıkk-ı âharı olduğu ma‘lûmumuz değildir, bizler bu husûsa bu vech üzere şâhidleriz şehâdet dahi ederiz deyü her biri edâ’-i şehâdet-i şer‘iyye ettiklerinde lede’t-ta‘dîl ve’t-tezkiye şehâdetleri makbûle olmağın mûcibiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 7 min-Cumâdelâhire sene [1]194. Şuhûdü’l-hâl: Mehmed Sâdık Efendi, Veliyüddin Ağa, Mustafa Ağa, Mehmed Emin Efendi.