İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 187 Hüküm no: 157 Orijinal metin no: [45b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskohi bt. Kigork’un Yedikule dışındaki ekmekçi fırını ve değirmeni bir ve dokuz buçuk mıh hissesini Agisa v. Minas’a yedi yüz elli guruşa sattığı Mahrûse-i Galata’ya muzâfe kasaba-i Beşiktaş’da İnceova Mahallesi mütemekkinlerinden İskohi bt. Kigork Nasrâniye tarafından husûs-ı âti’z-zikri ikrâra vekîl olduğu şahsını ârifân Beşiktaşlı Filibos v. Avanes ve Beşiktaşlı Otan v. Matagsar şehâdetleriyle sâbit olan [46a] Kigork v. Begos nâm [zimmî] meclis-i şer‘-i hatîr-i lâzımü’t-tevkīrde habbâz tâifesinden bâ‘isü’s-sifr Agisa v. Minas nâm zimmî muvâcehesinde ikrâr-ı tâm ve takrîr-i kelâm edip müvekkile-i mezkûre İskohi Nasrâniye Yedikule hâricinde vâki‘ bir bâb habbâz fırını ve ona merbût yirmi dört sehim i‘tibâr olunur altı horoslu bir bâb değirmen derûnunda mevcûde beyne’l-hiref gedik ta‘bîr olunur yirmi dört re’s bargir ve sâir âlât-ı lâzıme-i ma‘lûmeden mutasarrıfe olduğu bir re’s ve dokuz buçuk mıh hissesini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûr Agisa zimmîye yedi yüz elli guruşa bey‘ ü temlîk ve teslîm eylediğinde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr yedi yüz elli guruşu mesfûr Agisa zimmî yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mesfûr Agisa zimmînin zimmetini ibrâ-i âm ile ibrâ ve ıskāt eylediğinde, ol dahi ibrâ-i mezkûru kabûl edip fîmâ-ba‘d müvekkilem mesfûre İskohi Nasrâniyenin zikrolunan bir re’s bargir ve dokuz buçuk mıh ve sâir âlât-ı lâzıme-i ma‘lûmede asla ve kat‘â alâka ve medhali kalmayup mesfûr Agisa zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 11 min-C sene [1]194. Şuhûdü’l-hâl: Kanlıfırın Ustası el-Hâc Ahmed Ağa, Sayıcı Osman Usta, es-Seyyid Mehmed Said Ağa, Vartan, Mihail [Mikail], Serkiz, Abram, Mağdiser [Bağdısar].