İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 187 Hüküm no: 158 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Mehmed Beşe b. Mehmed’in Unkapanı’ndaki değirmenin dört hissesini Uncular Kethudası Mustafa Ağa b. Ahmed’e beş yüz yetmiş guruşa sattığı Uncu tâifesinden Mehmed Beşe b. Mehmed meclis-i şer‘-i hatîr-i lâzımü’t-tevkīrde zikri âtî on altı re’s bargirden dört re’s bargir[e] mutasarrıf olan Uncular Kethudâsı bâ‘isü’l-kitâb Mustafa Ağa b. Ahmed nâm kimesne mahzarında ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimde mülk ve hakkım olup İstanbul’da Kapan-ı dakīk dâhilinde Şa‘riyyeci değirmeni demekle ma‘rûf on altı sehim i‘tibâriyle dört horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur on altı re’s bargirden mutasarrıf olduğum on iki re’s bargirin sekiz re’sini yedimde ibkā ve dört re’s bargir ve sâir âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr Mustafa Ağa’ya beş yüz yetmiş guruşa bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ve kabûl ettikden sonra semeni olan meblağ-ı mezbûr beş yüz yetmiş guruşu mezbûr Mustafa Ağa yedinden bi’t-tamam ve’l-kemâl ahz ve kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mezbûr Mustafa Ağa’nın zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl edip fîmâ-ba‘d zikrolunan dört re’s bargir ve dört re’s bargire isâbet eden sâir âlât-ı lâzıme-i ma‘lûmede benim asla ve kat‘â alâka ve medhalim kalmayup müşteri-i mezbûr Mustafa Ağa’nın mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 19 min-Cumâdelâhire sene [1]194. Şuhûdü’l-hâl: el-Hâc Ahmed Ağa, Yiğitbaşı es-Seyyid Mehmed Emin, es-Seyyid Mehmed Said, Molla Ahmed, es-Seyyid el-Hâc Ahmed, Bedirzâde Molla Ali.