İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 192 Hüküm no: 164 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Yoseb’in vârislerinin Üsküdar İstavros’daki ekmekçi fırını ve Ortaköy’deki değirmenin dört hissesini Bedros v. Serkiz’e bin beş yüz guruşa sattıkları Habbâz tâifesinden olup bundan akdem hâlik olan Yoseb v. ( ) nâm zimmînin verâseti zevcesi İskohi bt. Avanes Nasrâniye ile sulbî kebîr oğlu Simaven ve sagīr oğullları Haçador ve Arutin zimmîlere münhasıra ve tashîh-i meselesi yirmi dört sehimden olup sihâm-ı mezkûreden üç sehmi mesfûre İskohi ve yedişer sehmi oğulları mesfûrûn Simaven ve Haçador ve Arutin zimmîlerden her birine isâbeti tahakkukundan sonra sagīrân-ı mesfûrân Haçador ve Arutin zimmîlerin anaları ve tesviye-i umûrlarına vasiye-i mansûbeleri mesfûre İskohi Nasrâniye ile kebîr oğlu mesfûr Simaven taraflarından husûs-ı âti’z-zikri ikrâra vekîl olduğu Mustafa Ağa b. Ahmed ve Vartan v. Tomas şehâdetleriyle sâbit olan Bedros v. Begos nâm zimmî meclis-i şer‘-i hatîr-i lâzımü’t-tevkīrde işbu bâ‘isü’s-sifr Bedros v. Serkiz nâm zimmî muvâcehesinde bi’l-vekâle ikrâr-ı tâm ve takrîr-i kelâm edip müvekkillerim mesfûrânın [babalarının] ile’l-helâk yedinde mülkü ve ba‘de helâkihî tashîh-i mezkûr üzere bi’l-irsi’ş-şer‘î bizlere isâbet ve intikāl eden medîne-i Üsküdar’a tâbi‘ İstavros nâm karyede vâki‘ bir bâb ekmekçi fırını ve ona merbût Ortaköy’de Bahçeli demekle ma‘rûf on iki sehim i‘tibâriyle üç horoslu bir bâb ekmekçi değirmeni derûnunda mevcûde beyne’l-esnâf gedik ta‘bîr olunur on iki re’s bargirden mutasarrıf olduğu dört re’s bargir ve sâir-i âlât-ı lâzıme-i ma‘lûmeden [48a] sagīrân-ı mezbûrânın hisse-i şâyi‘alarını hâlik-i mesfûrun düyûn-ı müsbetesi edâsı’çün müvekkile-i mesfûre âhara bey‘a kıbel-i şer‘den me’zûne olmağla, mesfûrânın hisseleri ile ma‘an kendi hisselerini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müşteri-i mesfûr Bedros zimmîye semen-i mislinden ezyed olduğu ihbâr olunan bin beş yüz guruşa bi’l-vekâle bey‘ ü temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr bin beş yüz guruşu müşteri-i mesfûr Bedros zimmî yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan bi’l-vekâle [mesfûr Bedros zimmînin zimmetini] ibrâ-i âm ile ibrâ ve ıskāt eylediğimde, ol dahi ibrâ-i mezkûru ba‘de’l-kabûl zikrolunan dört re’s bargir ve sâir âlât-ı lâzıme-i ma‘lûmede müvekkillerim mesfûrân ile sagīrân-ı mezbûrânın asla ve kat‘â alâka ve medhalleri kalmayup müşteri-i mesfûr Bedros zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 C sene [1]194. Şuhûdü’l-hâl: el-Hâc Ahmed Ağa, Uncular Kethudâsı Mustafa Ağa, Uncular Yiğitbaşısı el-Hâc Abdullah, Yiğitbaşı es-Seyyid Mehmed b. ( ), es-Seyyid Mehmed Said Ağa, Mikail Usta, Usta Vartan, Usta Filibos, Usta Bedros.