İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 193 Hüküm no: 165 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Arutin v. Agop’un vârislerinin Üsküdar İstavros’daki ekmekçi fırını ve Ortaköy’deki değirmenin iki hissesini Bedros v. Serkiz’e üç yüz guruşa sattıkları Habbâz tâifesinden iken bundan akdem hâlik olan Şehremînli Arutin v. Agop zimmînin verâseti sulbî kebîr oğulları Kapril ve Parnak ve Mikail ve sagīre kızları Sekpohi ve Lüsyen nâm sagīretâna münhasıra ve tashîh-i meselesi sekiz sehimden olup sihâm-ı mezkûreden iki sehmi oğulları mesfûrûna ve birer sehmi kızları mezbûretâna isâbeti tahakkukundan sonra mesfûr Kapril kendi tarafından asâleten ve kız karındaşları mesfûrânın tesviye-i umûrlarına vasî-i mansûbeleri olmağla vesâyeten ve mesfûrân Parnak ve Mikail asâleten meclis-i şer‘-i hatîr-i lâzımü’t-tevkīrde habbâz tâifesinden bâ‘isü’s-sifr Bedros v. Serkiz nâm zimmî muvâcehesinde her biri bi’l-asâle ve bi’l-vesâye ikrâr-ı tâm ve takrîr-i kelâm edip mûrisimiz hâlik-i mesfûrun ile’l-helâk yedinde mülkü ve ba‘de helâkihî tashîh-i mezkûr üzere bi’l-irsi’ş-şer‘î bizlere isâbet ve intikāl eden medîne-i Üsküdar’a tâbi‘ İstavros nâm karyede vâki‘ bir bâb ekmekçi fırını ve ona merbût Ortaköy’de Bahçeli demekle ma‘rûf on iki sehim i‘tibâriyle üç horoslu bir bâb ekmekçi değirmeni derûnunda mevcûde beyne’l-esnâf gedik ta‘bîr olunur on iki re’s bargirden mutasarrıf olduğumuz iki re’s bargir ve sâir-i âlât-ı lâzıme-i ma‘lûmeden sagīrân-ı mezbûrânın hisse-i şâyi‘alarını hâlik-i mesfûrun düyûn-ı müsbetesi edâsı’çün ben âhara bey‘a kıbel-i şer‘den me’zûn olmamla, mesfûrânın hisseleriyle ma‘an kendi hisse-i irsiyelerimizi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müşteri-i mesfûr Bedros zimmîye semen-i mislinden ezyed ve evfer olduğu ihbâr olunan üç yüz guruşa bi’l-asâle ve bi’l-vesâye bey‘ ve temlîk ve teslîm eylediğimizde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr üç yüz guruşu müşteri-i mesfûr Bedros zimmî yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan bi’l-asâle ve bi’l-vesâye ibrâ-i âm ile ibrâ ve ıskāt eylediğimizde, ol dahi ibrâ-i mezkûru ba‘de’l-kabûl zikrolunan iki re’s bargir ve sâir âlât-ı lâzıme-i ma‘lûmede bizim ve sagīrân-ı mesfûrânın asla ve kat‘â alâka ve medhallerimiz kalmayup müşteri-i mesfûr Bedros zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 C sene [1]194. Şuhûdü’l-hâl: eş-Şâhidûne’s-sâbıkūn.