İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 196 Hüküm no: 167 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul cedid esvap ve kapamacılar esnafının yiğitbaşılığına Avanes v. Ohan’ın tayin edildiği Mahmiye-i İstanbul’da Şehzâde Câmi‘-i şerîfi karşusunda Eski Odalar ittisâlinde vâki‘ cedîd esvâb ve kapama bey‘ eden esnâfın ihtiyârlarından Haçador v. Avanes ve Bedros v. David ve Bağdasar v. Donik ve Agop v. Serope ve Anderyas v. Sahak ve Sekyas v. Maroke ve Kapril v. Avanes ve Haçador v. Avanes ve Kigork v. Panayos ve sâirleri meclis-i şer‘-i şerîf-i enverde her biri takrîr-i kelâm ve bast ani’l-merâm edip tâife-i mezbûreden bâ-hüccet-i şer‘iyye yiğitbaşımız olan Ohanes v. Kapril zimmî hâlik olup hizmeti mu‘attal kaldığından hizmet-i mezkûreyi idâre ve rü’yete kādir ve esnâflarının müsinn ve ihtiyârlarından işbu bâ‘isü’s-sifr Avanes v. Ohan zimmî yiğitbaşı nasb olunmasını iltimâs etmeleriyle, mesfûr Avanes zimmî iltimâsları üzere kıbel-i şer‘den esnâf-ı merkūmeye yiğitbaşı nasb ve ta‘yîn olundukda, ol dahi nizâm-ı kadîmeleri üzere yiğitbaşılığa müte‘allik esnâf-ı mezkûrenin umûrlarını sadâkat ve istikāmet üzere idâre ve rü’yet edip hilâf-ı şer‘-i şerîf esnâf-ı mezkûreye vaz‘ ü hareket etmemek üzere ta‘ahhüd etmeğin mâ-vaka‘a bi’t-taleb ketb olundu. Hurrire fî-gurre-i Receb [li-]sene [11]94. Şuhûdü’l-hâl: İsmail Çelebi, Kemahlı İbrahim Çelebi, Musa Çelebi.