İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 197 Hüküm no: 168 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Mustafa’nın Şehzâdebaşı’ndaki ekmekçi fırını ve değirmenin dört hissesini Abdi Beşe’ye bin yedi yüz guruşa sattığı Mahmiye-i İstanbul’da Şehzâdebaşı’nda vâki‘ bir bâb habbâz fırını ve ona merbût Kesmekaya’da otuz iki sehim i‘tibâriyle sekiz horoslu bir bâb değirmende otuz iki re’s bargirden dört bargire ve sâir âlât-ı lâzıme-i ma‘lûmeye mutasarrıf olan Mehmed Beşe b. Mustafa nâm kimesne meclis-i şer‘-i hatîr-i lâzımü’t-tevkīrde değirmen-i mezkûrda sekiz re’s bargire mutasarrıf olan bâ‘isü’l-kitâb Abdi Beşe nâm kimesne mahzarında ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimde mülk ve hakkım olan değirmen-i mezkûrda vâki‘ dört re’s bargir ve âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr Abdi Beşe’ye bin yedi yüz guruşa bey‘ ü temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr bin yedi yüz guruşun bin üç yüz yetmiş guruşunu cânib-i mîrî ve Kapan tüccârına olan deynime ver deyü mezbûr Abdi Beşe’ye emredip, bâkīsi olan üç yüz otuz guruşun seksen guruşunu dahi mezbûr Abdi Beşe’ye olan seksen guruş deynime takās ve mahsûb eylediğimde, ol dahi mukāssa ve kabûl [ve] mâ‘adâsı olan iki yüz elli guruşu dahi mezbûr Abdi Beşe yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna ve sâir beynimizde cereyân eden ahz ü i‘tâ ve mu‘âmelât-ı şettâya müte‘allika âmme-i de‘âvî ve kâffe-i mutâlebâtdan mezbûr Abdi Beşe’nin şerîkleri işbu hazır bi’l-meclis İsmail Beşe ve Mehmed ve Molla Hasan’ın oğulları Mustafa ve Feyzullah’ın ve Sefer Beşe’nin ve Nureddin ve diğer İsmail’in ve Ömer’in zimmetlerini ibrâ-i âm ile ibrâ ve ıskāt eylediğimde, onlar dahi ber-vech-i muharrer ibrâ-i mezkûru ba‘de’l-kabûl zikrolunan dört re’s bargir ve dört re’s bargire isâbet eden sâir âlât-ı lâzıme-i ma‘lûmede benim asla ve kat‘â alâka ve medhalim kalmayup müşteri-i mezbûr Abdi Beşe’nin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dediğini mezbûrlardan her biri tasdîk etmeğin mâ-vaka‘a bi’t-taleb ketb olundu. Fî 2 min-Recebi’l-ferd sene [1]194. Şuhûdü’l-hâl: el-Hâc Ahmed Ağa, Yiğitbaşı es-Seyyid Mehmed Emin, es-Seyyid Mehmed Said, Uncular Kethudâsı Mustafa Ağa, Hâfız Molla Mustafa.