İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 198 Hüküm no: 169 Orijinal metin no: [49b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul dökmeciler esnafının kethudalığına Mehmed Usta b. Ali’nin tayin edildiği Âsitâne-i aliyye’de Süleymâniye Câmi‘-i şerîfi kurbünde ve Kantarcılar içinde vâki‘ dökmeci esnâfından dökmecibaşı el-Hâc Osman ve yiğitbaşıları Süleyman Usta ve ihtiyârlardan el-Hâc Mehmed Usta ve diğer Mehmed Usta ve Osman Usta ve Hüseyin Usta ve Ali Usta ve İbrahim Usta ve es-Seyyid Süleyman Usta ve es-Seyyid Ahmed Usta ve es-Seyyid Ali Usta ve Halil Usta ve diğer es-Seyyid Süleyman ve İsmail Usta ve diğer Mehmed Usta ve diğer Hüseyin Usta ve diğer Mehmed Usta ve diğer Ali Usta ve diğer Halil Usta ve Mustafa Usta ve sâirleri meclis-i şer‘-i şerîf-i enverde her biri takrîr-i kelâm <> ve bast-ı merâm edip [50a] hâlâ kethudâmız olan Mustafa Usta b. İbrahim pîr ve ihtiyâr olup umûr-ı esnâfı rü’yetde acz ve tekâsülü olmağla, kethudâlıkdan bi’l-külliye keff-i yed ve esnâfımızın kudemâsından örf ve âdetimize vâkıf ve nizâm ve intizâmımızı mûcib olan umûr ve ahvâlimize kemâ-yenbagī ârif ve her vechile kethudâlık hizmetini idâre ve rü’yete kādir [ve] cümlemizin muhtâr ve mu‘temedi olan işbu bâ‘isü’l-kitâb es-Seyyid Mehmed Usta b. Ali nâm kimesne kıbel-i şer‘den <<üzerlerine>> üzerimize kethudâ nasb ve ta‘yîn olunmasını iltimâs ettiklerinde, hâkim-i muvakki‘-i sadr-ı kitâb bi-tevkī‘ihi’r-refî‘ü’l-müstetâb ‒rafe‘a kadrehû mevlâhü’l-Vehhâb‒ efendi hazretleri dahi mezbûr es-Seyyid Mehmed Usta’yı esnâf-ı mezbûre üzerlerine kethudâ nasb ü ta‘yîn ve umûrlarını ber-mu‘tâd-ı kadîm rü’yet ve bir ferdi hilâf-ı şer‘-i mutahhar rencîde etmemek üzere tenbîh buyurduklarında, ol dahi kabûl ve hidemât-ı lâzımesini mahâllinde ikāmete ta‘ahhüd etmeğin mâ-vaka‘a bi’t-taleb ketb olundu. Fî 4 min-Receb sene [1]194. Şuhûdü’l-hâl: Kethudâ-yı muhzırân Mehmed Ağa b. Ahmed, İsmail Çelebi, Ali b. Mehmed.