İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 198 Hüküm no: 170 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Dimitraki v. Nikola’nın Balıkhâne ve Eski Yağkapanı’ndaki balık tuzlayıcı dükkânlarının yirmi sekiz buçuk hissesini Anaştaş v. Yani’ye altı yüz on guruşa sattığı Bakkāl Tüccârdan Dimitraki v. Nikola nâm zimmî meclis-i şer‘-i hatîr-i lâzımü’t-tevkīrde işbu bâ‘isü’s-sifr Anaştaş v. Yani nâm zimmî muvâcehesinde ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimde mülk ve hakkım olup mahrûse-i Galata’da yüz yirmi sehim i‘tibâr olunan Balıkhâne kurbünde bir bâb ve Eski Yağkapanı kurbünde bir bâb Balık Tuzlayıcı demekle meşhûr bakkāl dükkânları derûnlarında mevcûde beyne’l-hiref gedik ta‘bîr olunur âlât-ı lâzıme-i ma‘lûmede olan yirmi sekiz buçuk sehim hisse-i şâyi‘amı, tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müşteri-i mesfûr Anaştaş zimmîye altı yüz on guruşa bey‘ ü temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr altı yüz on guruşu mesfûr Anaştaş zimmî yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mesfûr Anaştaş zimmînin zimmetini ibrâ-ı âm ile ibrâ ve ıskāt eylediğimde, ol dahi ibrâ-i mezkûru kabûl edip fîmâ-ba‘d zikrolunan yirmi sekiz buçuk sehimde benim asla ve kat‘â alâka ve medhalim kalmayup müşteri-i mesfûr Anaştaş zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 min-Recebi’l-ferd sene [1]194. Şuhûdü’l-hâl: Muhzırân Kethudâsı Mehmed Ağa, İsmail Çelebi, Akşehirli Osman, Tanaş v. Yuvan, Togodoş v. Dimitri, Manol v. Apastol.