İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 199 Hüküm no: 171 Orijinal metin no: [50a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Yani’nin ölen babasının ortaklarıyla birbirlerinin zimmetlerini ibra ettikleri Boyar tâifesinden Nikola v. Yani nâm zimmî meclis-i şer‘-i hatîr-i lâzımü’t-tevkīrde işbu bâ‘isü’l-vesîka Anaştaş v. Yani ve Kozma v. Togodoş nâm zimmîler muvâcehelerinde mesfûrân Anaştaş ve Kozma ve gāib ani’l-meclis Anton v. İlya ve Aci Mihal v. Yani ve Vasil v. Sava ve Serafim v. Anaştaş nâm zimmîler hâlik olan babam Yani zimmî ile hayatında tuzlu balık bey‘ ve şirâsında bir müddet şirket-i inân ile şerîkler olup hesâb-ı sahîh ile hesâblarını rü’yet eylediklerinde, gerek re’s-i mâl ve gerek fâideden babam mesfûrun hisselerini bi’t-tamam ve’l-kemâl babam mesfûra hayatında def‘ ü teslîm eylediklerinde, ol dahi ber-vech-i muharrer ahz ü istifâ edip husûs-ı şirkete ve fâideye müte‘allika asla ve kat‘â bir akçe ve bir habbe hakkı ve alacağı kalmamağla mesfûrların hayatında zimmetlerini ibrâ-i âmm-ı kātı‘ü’n-nizâ‘ [50b] ve ıskāt-ı tâmm-ı râfi‘ü’l-hısâm ile ibrâ ve ıskāt eyledikde, mesfûrûn Anaştaş ve Kozma ve Aci Mihal ve Vasil ve Serafim ve diğer Anaştaş zimmîlerden her biri dahi kabûl etmişidi dedikde, mesfûrûn dahi mukırr-ı mesfûr Nikola zimmîyi bi’l-cümle kelimât-ı meşrûhasında tasdîk etmeleriyle mâ-vaka‘a bi’t-taleb ketb olundu. Fî 4 min-Recebi’l-ferd sene [1]194. Şuhûdü’l-hâl: Pazarbaşı İbrahim Ağa b. el-Hâc Mehmed, Halil Bölükbaşı, Hasan Bölükbaşı, İsmail b. Ali, Molla Musa.